- १८ कार्तिक २०८३, बुधबार / Nov 4, 2026
काठमाडौं । विगत लामो समयदेखि रिक्त प्रतिनिधि सभाको उपसभामुख पदमा नेपाली काँग्रेसकी सांसद् पुष्पा भुसाल निर्वाचित भएकी छन् । २०७६ साल माघ ६ गते तत्कालीन उपसभामुख शिवमाया तुम्बाहाम्फेले राजीनामा दिएपछि अहिलेसम्म खाली रहेको यो पदमा आज चुनाव भएको हो ।
शुक्रबार संसद भवन बानेश्वरमा भएको निर्वाचनमा सत्तारुढ पाँचदलीय गठबन्धनकी साझा उम्मेदवार सांसद भुसालको पक्षमा कूल १४८ मत परेको थियो ।
उपसभामुख पदमा नेपाली काँग्रेसकी भुसाल सत्ता गठबन्धनकी साझा उम्मेदवार र नेकपा एमालेकी विद्या भट्टराई उम्मेदवार थिए । भट्टराईले कूल ९३ मत परेको प्राप्त गरिन् । एक जना भने तटस्थ बसेका थिए ।
भुसालको उम्मेदवारीको प्रस्तावक नेकपा माओवादी केन्द्रका प्रमुख सचेतक देव गुरुङ रहेका थिए भने समर्थकमा एकीकृत समाजवादीकी सांसद लक्ष्मी चौधरी रहेकी थिइन् ।
सभामुख अग्नि प्रसाद सापकोटाले मत विभाजनद्वारा निर्वाचन प्रक्रिया सम्पन्न गराएका हुन् । उम्मेदवारको पक्षमा रहनेलाई सभामुखको आसनको दायाँ तर्फको लबीमा गएर, विपक्षमा रहनेलाई सभामुखको आसनको देब्रेतर्फको लबीमा गएर र तटस्थ रहनेलाई सभामुखको आसनको पछाडिको लवीबीमा गई हस्ताक्षर गरेर मत जाहेर गर्न समय दिएका थिए ।
