- १० असार २०८३, बुधबार / Jun 24, 2026
काठमाण्डौ । सिन्धुपाल्चोकको मेलम्ची नदीमा ‘बेलिब्रिज’ बनाउन सुरु भएको छ । सिन्धुपाल्चोकका तीनवटा पालिका मेलम्ची, पाँचपोखरी र इन्द्रावती जोड्ने
मेलम्चि नदीमा नेपाली सेनाको सहयोगमा ‘बेलिब्रिज’ बनाउन थालिएको हो । मेलम्चीपारिको वडा नम्बर ९ र १० तथा पाँचपोखरी थाङ्पाल र इन्द्रावती गाउँपालिका जोड्ने बेलिब्रिज बनेपछि स्थानीयबासिन्दाले प्रत्यक्ष लाभ लिने उल्लेख गरिएको छ ।
सदरमुकाम चौतारा जाने छोटो दूरीको ‘रुट’ का रूपमा समेत यो सडकलाई प्रयोग गर्न सकिन्छ । बर्खामा स्थानीय नागरिकलाई आवतजावत गर्न निकै समस्या हुने भएकाले बेलिब्रिज बनाउन थालिएको बताइएको छ । झण्डै दुई हप्तामा बेलिब्रिज बनाउने काम सकिने नेपाली सेनाको इञ्जिनियरिङ विभाग, १४ नं बाहिनी अड्डाले जनाएको छ ।
हिउँदको समयमा ह्युमपाइप राखेर सडक खुलाए पनि बर्खा लागेसँगै समस्या भैरहेको छ । २०७८ साल असार १ गते आएको बाढीले पक्की पुल बगाउँदा त्यहाँका बासिन्दाले बर्खाको समयमा सास्ती खेप्दै आएका छन् ।
