दुवै डोज खोप लगाएकाहरू पनि संक्रमित, भेन्टिलेटरमा उपचार हुदै

काठमाडौं । कोभिड–१९ विरुद्धको दुवै डोज खोप लगाएका व्यक्तिको स्वास्थ्यमासमेत जटिल समस्या देखिएको छ । उपत्यकाका सरकारी अस्पतालमा दुवै डोज खोप लगाएका व्यक्ति पनि संक्रमित भएर गम्भीर अवस्थामा उपचार गरिरहेको चिकित्सकले बताएका छन् ।

जनसंख्याको करिव १४ प्रतिशत व्यक्तिले कोरोना भाइरस विरुद्धको दुवै डोज खोप लगाइसकेपनि संक्रमण बढ्दै गएकाले सजग रहन विज्ञले आग्रह गरेका छन् ।

कोभिशिल्ड, भेरोसेल र जोनसन खोप ४० लाख ५२ हजार व्यक्तिले लगाइसकेको स्वास्थ्य मन्त्रालयले जनाएको छ । तर, दुवै डोज खोप पुरा गरेका व्यक्ति पनि कोरोना संक्रमणका कारण स्वास्थ्यमा समस्या देखिएर अस्पताल भर्ना हुनुपरेको अवस्था छ ।

खोप लगाएकालाई संक्रमण देखिए पनि जटिल स्वास्थ्य समस्या नहुने जनाइएको थियो तर हाल कोरोना संक्रमण देखिएर अस्पताल भर्ना हुने बिरामी खोप लगाएका धेरै भएको चिकित्सकले बताएका छन् ।

उपत्यकाका सरकारी अस्पतालहरूमा बुझ्दा दुवै डोज खोप लगाएका व्यक्तिमा संक्रमण भएर आईसीयू र भेन्टिलेटरमा भर्ना भएको पाइएको छ ।