पशुपति क्षेत्रमा सुरक्षा व्यवस्था कडा

काठमाण्डौ । पशुपति क्षेत्रको सुरक्षा व्यवस्था बाला चतुर्दशी मेलाका लागि कडा पारिएको छ । पशुपतिनाथ मूल मन्दिर प्राङ्गणमा दिवङ्गत पितृका नाममा महादीपदान शुक्रबार बिहान शतबीज छर्ने भएपछि सुरक्षा व्यवस्था कडा पारिएको हो । यसको तयारीका लागि पशुपति क्षेत्रमा भीडभाड बढेको छ ।

विहिबार रातभर महादीपदान गरेर बसेका भक्तजनले चतुर्दशीका दिन भोलि बिहान स्नान गरी पशुपति क्षेत्रको मृगस्थलीलगायत ठाउँमा शतबीज छर्ने गर्छन् । यसो गरेमा दिवङ्गत पितृले शान्ति पाउने धार्मिक विश्वास छ । हरेक वर्ष मंसिर कृष्ण पक्षको त्रयोदशीको रातिदेखि सुरु हुने मेलामा भक्तजनको घुइँचो लाग्ने गर्छ ।

भीड व्यवस्थापन गर्न विभिन्न ठाउँमा सुरक्षा व्यवस्था कडा पारिएको पशुपति क्षेत्र विकास कोषका कार्यकारी निर्देशक डा। घनश्याम खतिवडाले जानकारी दिनु भयो । उहाँका अनुसार आज बिहानदेखि भोलि दिउँसोसम्म मन्दिर प्रवेश गर्ने विभिन्न बाटोमा सबै प्रकारका गाडी प्रवेशलाई रोक लगाइएको छ ।