पाटेबाघको आक्रमणबाट २ जनाको मृत्यु, मान्छे खान थालेपछि स्थानीय त्रसित

बर्दिया । पाटेबाघको आक्रमणमा परी दुई जनाको ज्यान गएको छ । मधुवन नगरपालिका(३ धनौरामा अवस्थित बेलझुण्डी सामुदायिक वनमा बाघले आक्रमण गर्दा दुईजना स्थानीय युवाको मृत्यु भएको हो ।

नगरपालिका(३ का २९ वर्षीय उमेश चौधरी र २६ वर्षीय दिनेश चौधरीको मृत्यु भएको डिभिजनल वन कार्यालय बर्दियाले जनाएको छ । जैविकमार्ग नजिकै सामुदायिक वनलाई वासस्थान बनाएको पाटेबाघले मान्छे खान थालेपछि स्थानिय त्रसित भएका छन्। सरोकारवाला निकायले आक्रामक बाघ नियन्त्रण गर्नुपर्ने माग स्थानीयको छ ।

मंगलबार बिहानैदेखि हराएका उमेशलाई केही साथीसँग सामुदायिक वनमा खोज्न गएका बेला दिनेशलाई बाघले आक्रमण गरेको थियो । सँगै गएका साथीहरु उनलाई बाघले आक्रमण गरेपछि गाउँमा आएर होहल्ला गरी सुरक्षाकर्मी सहितको टोली वनमा पुगेको थियो ।