बँदेललाई थापेको पासोमा परेर एक जनाको मृत्यु

सुस्ता पश्चिम । बँदेल मार्न थापेको पासोमा परेर नवलपरासीमा एक जनाको ज्यान गएको छ । बर्दघाट–सुस्ता पश्चिममा घर नजिकैको जङ्गलबाट आउने बँदेलले धानबाली नष्ट गरेको भन्दै बँदेल मार्न पासो थापियो ।

सोही पासोमा परी रामग्राम नगरपालिका–१४ पर्सावलका ५५ वर्षीय होमनारायण यादवको ज्यान गएको हो । शुक्रबार राति घरबाट निस्केका श्रीमान् हराएको भनी यादवकी श्रीमती सोनियाले खोजतलासका लागि प्रहरीमा निवेदन दिइन् । प्रहरीले खोजतलास ग¥यो । खोजतलास गर्ने क्रममा यादवसँगै अन्य चार जना मिलेर पासो थापेको र उनको मृत्यु भएपछि चारै जना फरार भएको पत्ता लागेको छ ।

फरारको खोजीकार्य जारी रहेको प्रहरी नायब उपरीक्षक राजु लामाले बताए । दुई जनालाई भने रुपन्देहीबाट नियन्त्रणमा लिई अनुसन्धान शुरु गरेको प्रहरीको भनाई छ । पक्राउ परेका बाबुराम चौधरी र मोहन चौधरीले यादवको पासोमा परी मृत्यु भएपछि घटनास्थलभन्दा केही पर कुलामा खाल्डो खनेर शव पुरेको बयान दिएका थिए ।

प्रहरीका अनुसार शुक्रबार राति उनीहरु पाँचै जनाले पासो थापेर घर गएको र बँदेल परेपछि खबर गर्ने जिम्मा यादवकै थियो । अबेरसम्म पनि यादवले जानकारी नदिएपछि पासो थापेको ठाउँमा आफूहरु पुग्दा यादव मृत फेला परेपछि खाल्डो खनेर पुरिएको पक्राउ परेकाहरुले बताएका छन्।