- ११ कार्तिक २०८३, बुधबार / Oct 28, 2026
१९ बैशाख २०७७ काठमाडौं । उपराष्ट्रपति नन्दबहादुर पुनले आगामी बजेट निर्माण गर्दा श्रमिक वर्गलाई विशेष ध्यान दिन सरकारलाई ध्यानाकर्षण गराएका छन् ।
अन्तर्राष्ट्रिय श्रमिक दिवसको अवसरमा शुभकामना सन्देश दिँदै उपराष्ट्रपति पुनले कोभिड–१९ को महामारीबाट देशको अर्थतन्त्रमा पर्ने प्रभावका बारेमा ध्यान दिन र देशभित्र उत्पन्न हुने बेरोजगारी समस्या अन्त गर्न सरकारको ध्यानाकर्षण गराएका हुन् ।
लकडाउन लम्बिदै जाँदा काममा जान नपाउने र रोजगारी खोसिने अवस्थाले श्रमिक वर्गको आगामी दिन झनै कठिन बन्ने परिदृष्य देखा परिरहेका भन्दै उपराष्ट्रपति पुनले सबैखाले चुनौतीको सामना गर्न तयार रहनुको विकल्प नभएको बताएका छन् ।
‘कोरोनाका कारण अन्तर्राष्ट्रिय श्रम बजारमा रहेका लाखौं नेपालीले रोजगारी गुमाउन सक्ने, त्यसबाट देशभित्र उत्पन्न हुने बेरोजगारी र देशको अर्थतन्त्रमा पर्ने प्रभावका बारेमा ध्यान दिन र तयारी गर्न म सरकारको ध्यानाकर्षण गराउन चाहन्छु ।’ पुनले भने ।
महामारीबाट सबैभन्दा बढी श्रमिक वर्ग प्रभावित भएको स्वदेश तथा विदेशमा रहेका लाखौं नेपाली श्रमिकको अवस्था कठिन बनिरहेको उनको भनाइ छ ।
