- ११ कार्तिक २०८३, बुधबार / Oct 28, 2026
१९ जेठ २०७७, काठमाडौं । बाँके जिल्लाको राप्ती सोनारी गाउँपालिका–२, ठुरिया जंगलमा गाडी दुर्घटना भएको छ । भारतबाट मजदुरी गरेर नेपालगञ्ज हुदै सल्यान घर जान लागेकाहरु दुर्घटनामा परेका हुन् । गाडी दुर्घटना हुँदा मृत्यु हुनेको संख्या १२ पुगेको छ । २० जना घाइते भएका छन् ।
कामको शिलशिलामा भारत गएका उनीहरु भारतको रूपैडिया नाका हुँदै नेपाल प्रवेश गरि नेपालगञ्जबाट सल्यानतर्फ जाँदै गरेको फोर्स गाडी गएराति करिब १२ बजेतिर दुर्घटनामा परेको हो । ११ जनाको घटनास्थलमै र एक जनाको भेरी अञ्चल अस्पताल नेपालगन्जमा उपचारको क्रममा मृत्यु भएको जिल्ला प्रहरी कार्यालय बाँकेका इन्सपेक्टर हृदयश सापकोटाले जानकारी दिए ।
नेपाल प्रहरीका अनुसार ना ५ ख ५९९५ नम्बरको गाडी रोकिराखेको बा ४ ख ९०६४ नम्बरको ट्रकमा ठोक्किएर दुर्घटना भएको हो । प्रमुख जिल्ला अधिकारी रामबहादुर कुरुम्वाङका अनुसार गाडीको तीव्र वेगका कारण अनियन्त्रित भई ट्रकमा ठोक्किएको प्रारम्भिक अनुमान हो ।
दुर्घटनाका मृतक र घाइते सबैलाई नेपालगञ्जस्थित भेरी अस्पतालमा लगिएको छ । घाइतेमध्ये तीन जनाको अवस्था गम्भीर भएकाले अन्यत्र रिफर गर्ने तयारी भइरहेको नेपाल प्रहरीले जानकारी दिएको छ ।
मृतक मध्यमा ११ जना पुरुष र एक महिला छिन् । मृतकको सनाखत हुन सकेको छैन । सुरुमा सल्यानका मानिसहरु गाडीमा रहेको भनिए पनि पछि सो गाडीमा दाङ र रोल्पाका मानिसहरु पनि पाइएको बताइएको छ । नेपाल प्रहरीका अनुसार सनाखत गर्ने क्रम चलिरहेको छ ।
