बाढीमा परेर भारतको सिक्किममा १४ जनाको मृत्यु

एजेन्सी । भारतको सिक्किम बाढीमा परेर १४ जनाको ज्यान गएको छ । उक्त राज्यको उत्तरी क्षेत्रमा रहेको ल्होनाक ताल फुटेर आएको बाढीका कारण सेनाका २२ जवानसहित एक सय २ जना बेपत्ता भएका छन् । भवन र गाडीमा समेत क्षति पुगेको छ ।

भारतीय प्रधानमन्त्री नरेन्द्र मोदीले बुधबार सिक्किमका मुख्यमन्त्री प्रेमसिंह तामाङसँग कुरा गर्दै आफूले सक्दो सहयोग गर्ने आश्वासन समेत दिएका छन् । पाँच वटा राहत शिविर खोलिएको र उद्धारका लागि सेनासहितका सयौँ सुरक्षाकर्मी प्रभावित क्षेत्रमा खटिएका छन् ।

बेपत्ताको खोजी र उद्धारका काम भैरहेको खोज र उद्धारमा खटिएका अधिकारीलाई उद्धृत गरी बीबीसीले जनाएको छ । सिक्किम राज्य सरकारले बुधबार बिहान ताल फुटेर टिस्टा नदीमा ठूलो बाढी आएपछि विभिन्न भागमा तीन हजारभन्दा धेरै पर्यटकहरू फसेका जनाएको छ ।