बिहार विधानसभा चुनावको दोस्रो तथा अन्तिम चरणको मतदान शान्तिपूर्ण रूपमा सम्पन्न

एजेन्सी । भारतको बिहारमा भएको विधानसभा चुनावको दोस्रो र अन्तिम चरणको मतदान हिजो शान्तिपूर्ण रूपमा सम्पन्न भएको छ। बिहारका मुख्य निर्वाचन अधिकारी विनोद सिंह गुन्जियालका अनुसार, दोस्रो चरणमा कुल ६८.७९ प्रतिशत मत खसेको छ।

बीबीसीका अनुसार, दुवै चरणको औसत मतदान दर ६६.९ प्रतिशत पुगेको छ, जुन अघिल्लो चुनावभन्दा करिब ६.९ प्रतिशत बढी हो।यसपटक महिलाहरूले पुरुषभन्दा बढी मतदान गरेका छन्। कुल ७१.६ प्रतिशत महिलाले मतदान गरे भने पुरुषको मतदान दर ६२.८ प्रतिशत मात्र रह्यो।

बिहारमा करिब ७ करोड ४५ लाख मतदाता रहेका छन् र यसपटक २ हजार १६ जना उम्मेदवार प्रतिस्पर्धामा छन्। विहार निर्वाचन आयोगका अनुसार, मतदान पूर्ण रूपमा शान्तिपूर्ण रह्यो र कुनै पनि हिंसात्मक घटना भएको रिपोर्ट प्राप्त भएको छैन।

मतदान अघि मात्रै झन्डै ३ करोड ५२ लाख भारतीय रुपैयाँ बराबरका अवैध सामग्री बरामद गरिएको थियो। बिहार विधानसभा चुनावको मतगणना नोभेम्बर १४ तारिखमा हुनेछ।

प्रारम्भिक एग्जिट पोलहरूमा सत्तारूढ एनडीए गठबन्धन (भारतीय जनता पार्टी–जेडीयू) अग्रस्थानमा देखिएको छ, तर अन्तिम नतिजा आएपछि मात्र यसको पुष्टि हुनेछ।