ब्राजिलको पेट्रोपोलिसमा आपत्काल घोषणा

ब्राजिल । ब्राजिलको पेट्रोपोलिस सहरमा बाढीका कारण ज्यान गुमाउनेको सङ्ख्या ९४ पुगेको छ । रियो दि जिनेरियोको उत्तरतर्फ पर्ने पहाडी सहरमा दशकौँपछि ठूलो मुसलधारे वर्षा भएपछि आएको बाढीका कारण ९४ जनाको ज्यान गएको र हजारौँ नागरिक प्रभावित भएका हुन । रुस भ्रमणमा रहेका राष्ट्रपति जइर बोल्सोनारोले त्यहाँ तत्कालै सहायता पठाइने बताएका छन् ।

पेट्रोपोलिस सहरमा आपत्काल घोषणा गरिएको छ । उद्धारकर्ताले पुरिएका मानिसलाई खोजिरहेका छन् । बाढी तथा डुबानका कारण झण्डै ८० घर क्षति भएका र तीन सय जनालाई विद्यालयमा आश्रय दिइ सुरक्षित राखिएको पेट्रोपोलिस नगरप्रमुखको कार्यालयले जनाएको छ । यसै महिनाको सुरुमा मुसलधारे वर्षाका कारण बाढी र पहिरोमा परि दक्षिणपूर्वी ब्राजिलमा २८ जनाको ज्यान गएको थियो । रियो दि जिनेरियो राज्यका गभर्नरले सन् १९३२ पछि ठूलो वर्षा भएको बताएका छन्। महिनाभरिमा पर्ने पानी केही घण्टामा पर्दा क्षति भएको जलवायु विज्ञलाई उदृत गरी बीबीसीले जनाएको छ । हिलो मिसिएको भेल घरमा पसेको छ।