भक्तपुरका सार्वजनिक यातायात भदौ १५ गते सम्म पूर्णरुपमा बन्द

२ भदौ २०७७ भक्तपुर । उपत्यकालगायत विभिन्न सहरहरुमा दैनिक सयौंको संख्यामा संक्रमित थपिरहेको र भक्तपुरमा पनि संक्रमितहरु बढ्दै गएपछि सार्वजनिक यातायात भदौ १५ गते सम्मका लागि बन्द गरिएको छ ।

संक्रमण समुदायस्तरमा फैलिन नदिन भक्तपुर नगरभित्र सञ्चालन हुने छोटो दुरीका सार्वजनिक यातायातहरु भोलि भदौ ३ गतेदेखि भदौ १५ गतेसम्मका लागि पूर्ण रुपमा बन्द गर्ने निर्णय नगरपालिकाले गरेको हो । नगर प्रमुख सुनिल प्रजापतिको अध्यक्षतामा बसेको यातायात व्यवसायीको मंगलबार बैठकले यातायात बन्द गर्ने निर्णय गरिएको नगरपालिकाले जनाएको छ ।

बैठकमा विश्वव्यापी महामारीको रुपमा फैलिरहेको कोरोना भाइरस (कोभिड १९) रोग तीव्र गतिमा बढिरहेकोले नगरपालिकाले गरेको निर्णय प्रति पूर्ण समर्थन रहेको यातायात व्यवसायीले बताएका छन् ।