- ६ कार्तिक २०८३, शुक्रबार / Oct 23, 2026
काठमाडौं । ७५३ वटै स्थानीय तहमा छिटफुट घटनाबाहेक उत्साहजनक रुपमा मतदान भइरहेको निर्वाचन आयोगले जनाएको छ । मध्यान्ह १२ः३० बजेसम्म देशभर करिब ३६ प्रतिशत मतदान भइसकेको निर्वाचन आयोगले जनाएको छ ।
दैलेख, दोलखा, सर्लाही, सप्तरी, रामेछाप, पर्वत, हुम्ला र बाजुराका केही स्थानमा सामान्य विवादका कारण मतदान कार्य केही समय अवरुद्ध भएको छ भने अन्य स्थानमा उत्साहका साथ मतदान भइरहेको छ ।
यता भक्तपुरमा भने ५० प्रतिशत मतदान भएको जनाइएको छ । सूर्यविनायक, भक्तपुर, चाँगुनारायण र ठिमीका मतदान केन्द्रमा उत्साहकासाथ विहान सात बजेदेखि निर्वाचन भइरहेको निर्वाचन गोपाल प्रसाद वास्तोलाले बताए ।
यता सूर्यविनायक नगरपालिकाका मतदान केन्द्रमा शान्तिपूर्ण वातावरणमा मतदान भइरहेको र आज बेलेकाबाट नै गणना गर्ने तयारी गरिरहेको निर्वाचन अधिकृत सरिता कुमारी खतिवडाले कैलाश खबरलाई बताइन् ।
मतदान सकिएपछि सबै मतपेटिका राष्ट्रिय प्राणी उद्यान सूर्यविनायकमा जम्मा गरेर सीसी क्यामेराको निगरानीमा मतगणना अघि बढाइने उनको भनाइ छ । यस्तै उत्साह जनकरुपमा मतदाताले मतदानमा भाग लगिरहेको मध्यपुर थिमी नगरपालिका मतदान केन्द्रका निर्वाचन अधिकृत मैया कंडेलले बताइन् ।
त्यस्तै चाँगुनारायण नगरपालिकामा पनि मतदाताले उत्साहित भएर सहभागि भईरहेको निर्वाचन अधिकृत फणेश्र्वरी घिमिरेको भनाइ छ । यता भक्तपुर नगरपालिकाका मतदान केन्द्रमा भने नेपाल मजदुर किसान पार्टीका अध्यक्ष रोहितले मतदान गरिसकेपछि मतदाता उत्साहित भएर मतदान गरिरहेको मुख्य निर्वाचन अधिकृत गोपाल बास्तोलाले बताए ।
