- ११ बैशाख २०८३, शुक्रबार / Apr 24, 2026
काठमाडौँ । मालदिभ्सका पूर्वराष्ट्रपति मोहम्मद नाशिदमाथि बम हमला भएकाे छ । राजधानी मालेमा भएको विष्फोटमा उनी घाइते भएका छन्। संसद्काे बहालवाला सभामुख रहेका नाशिदमाथि हमला भएको स्थानीय सञ्चार माध्यमले जनाएका छन् ।
राजधानी मालेको निलोआफरु मागु इलाकामा उनी चढेको कार नजिकै विष्फोट भएको थियो। मालदिभ्स प्रहरीले ट्विटमार्फत घटनाबारे जानकारी दिँदै घाइते भएका नाशिदको एक अस्पतालमा उपचार भइरहेको जनाएको छ।अस्पतालका अनुसार मोहम्मद नाशिदलाई धेरै ठाउँमा चोट लागेको छ तर उनको स्वास्थ्य अवस्था स्थिर रहेको छ।
प्रहरीले घटनास्थल नियन्त्रणमा लिएर अनुसन्धान भइरहेको जनाएको छ। उनका समर्थकहरु अस्पतालबाहिर भेला भएका छन्।
माल्दिभ्सका हालका राष्ट्रपति इबु सोलिहले एउटा ट्वीटर सन्देश लेख्दै प्रहरीले उक्त घटनाका सम्बन्धमा छानबिन थालेको जानकारी दिएका छन्।
