युवा चिनियाँ वैज्ञानिकहरूका लागि स्थापित अन्वेषक पुरस्कार विजेता घोषणा

बेइजिङ । चीनमा पूर्णकालिक रूपमा काम गर्ने युवा वैज्ञानिकहरूलाई सम्मान गर्ने सन् २०२२ को अन्वेषक पुरस्कार (एक्सप्लोरर प्राइज) का ५० जना विजेताहरूको समूहको नाम बिहीबार सार्वजनिक गरिएको छ । यस वर्ष चिकित्सा विज्ञानको क्षेत्रलाई पुरस्कार श्रेणीमा नयाँ रूपमा समावेश गरिएको छ भने पाँच जना क्लिनिकल अनुसन्धानकर्ताहरूलाई सम्मानित गरिएको छ ।

प्रत्येक विजेतालाई टेन्सेन्ट फाउन्डेसनले आगामी पाँच वर्षमा कुल ३० लाख युआन (करिब ४ लाख ३० हजार अमेरिकी डलर) प्रदान गर्ने आयोजकले जनाएको छ । अन्वेषक पुरस्कार सन् २०१८ मा टेनसेन्टका अध्यक्ष तथा प्रमुख कार्यकारी अधिकृत पोनीमा र १४ जना वैज्ञानिकहरूले संयुक्त रूपमा स्थापना गरेका थिए ।

चिनियाँ मुख्य भूमि, हङकङ र मकाओमा आधारित ४५ वर्षभन्दा कम उमेरका पूर्णकालिक वैज्ञानिकहरूलाई गणित र भौतिकविज्ञान, उन्नत उत्पादन, र ऊर्जा र वातावरण विज्ञानसहित आधारभूत विज्ञान र अत्याधुनिक प्रविधिका १० क्षेत्रहरूको विकासमा सहयोग गर्न सुरु गरेका थिए । सूचना तथा विद्युतीय प्रबिधि विधामा पुरस्कार विजेता वाङ गुआङयु सन् १९९० को दशकमा जन्मिएका पहिलो पुरस्कार विजेता हुनुहुन्छ ।

उहाँको अनुसन्धान कार्य ‘आर्टिफिसियल इन्टेलिजेन्स टेक्नोलोजी’लाई चिकित्सा उपचारमा रूपान्तरण गर्नमा केन्द्रित थियो । अर्धचालकसम्बन्धी वैज्ञानिक माई पिरान (पुइ इन माक) मकाओबाट पहिलो पुरस्कार विजेता हुनुहुन्छ । हङकङका भौतिक वैज्ञानिक यिन सियाओबो र फान झियोङलाई यससम्बन्धी अन्तरविषय अध्ययनमा योगदानको लागि सम्मानित गरिएको छ । सन् २०२२ सम्ममा अन्वेषक पुरस्कारले २०० जना होनहार युवा वैज्ञानिकलाई आर्थिक सहयोगसहित उनीहरूको कामको लागि प्रोत्साहन गरेको आयोजकले जनाएको छ ।