राप्रपाले कर्णाली सरकारलाई दिएको समर्थन फिर्ता लियो

सुर्खेत । कर्णाली सरकारलाई दिएको समर्थन राष्ट्रिय प्रजातन्त्र पार्टीले फिर्ता लिएको छ। मुख्यमन्त्री राजकुमार शर्मालाई दिएको समर्थन बिहीबार राप्रपा कर्णाली प्रदेशसभा सदस्य सन्तोषी शाहीले फिर्ता लिएको जानकारी गराएकी हुन्। कर्णाली प्रदेश सरकारबाट एमाले बाहिरिए पनि सरकार सुरक्षित हुने देखिन्छ। कर्णालीमा तीन मन्त्रालयसहित एमाले सरकारमा छ। केन्द्रमा बाहिरिएसँगै एमालेले प्रदेशमा पनि सरकार छाड्ने अनुमानबीच जोडघटाउ सुरु भएको छ ।

प्रदेशसभा सदस्य शाहीले प्रदेश प्रमुख तिलक परियारसामु माओवादीबाट मुख्यमन्त्री बनेका शर्मालाई दिएको समर्थन फिर्ता लिएको जानकारी गराएकी छन्। कर्णाली प्रदेशमा राप्रपाको एक सिट छ। गठबन्धन दलले समर्थन फिर्ता लिएसँगै मुख्यमन्त्रीले ३० दिनभित्र विश्वासको मत लिनुपर्नेछ।