- ३० आश्विन २०८३, शुक्रबार / Oct 16, 2026
काठमाण्डौ । भारतीय र तेस्रो देशका पर्यटक धार्मिक तथा पर्यटकीय स्थल लुम्बिनीमा आउने ह्वातै बढेको छ । पाँच महिनामा लुम्बिनीमा चार लाख ७० हजारभन्दा धेरै पर्यटक भित्रिएसंगै यहाँ आउने पर्यटकको संखया ह्वातै बढेको हो । लुम्बिनीमा आन्तरिक पर्यटकको पनि चहलपहल बढिरहेको छ ।जनवरीदेखि मे महिनासम्ममा ६७ देशका ३४ हजार चार सय १३ जना राहदानी लिएका, तीन लाख २४ हजार दुई सय ६८ नेपाली र एक लाख ११ हजार आठ सय ६१ भारतीय नागरिकले गौतम बुद्धको जन्मस्थल लुम्बिनीको भ्रमण गरेको तथ्याङ्क छ ।
सन् २०२३ को जनवरीदेखि मे महिनासम्म चार लाख ७० हजार पाँच सय ४२ जना पर्यटक लुम्बिनी भित्रिएका हुन् । सन् २०२२ को जनवरीदेखि मे महिनासम्म तीन लाख ६२ हजार ५६ जनाले लुम्बिनी भ्रमण गरेका थिए । गएको वर्षभन्दा यस वर्ष भित्रिएका पर्यटकको सङ्ख्या एक लाख आठ हजारभन्दा धेरै रहेको छ । कोरोना महामारीको बेला सन् २०२१ मा ६८ देशका एक हजार एक सय ९७ जना राहदानी लिएका नागरिकले लुम्बिनी भ्रमण गरेका थिए ।
पाँच महिनाको अवधिमा नेपाली र भारतीय नागरिकबाहेक थाइल्यान्डका आठ हजार दुई सय ४७, श्रीलङ्काका पाँच हजार सात सय २१, म्यानमारका पाँच हजार तीन सय ९८, भियतनामका तीन हजार दुई सय ३५, कोरियाका दुई हजार छ सय २९, चीनका एक हजार दुई सय आठ र अन्य देशका सात हजार छ सय ७५ जना नागरिकले लुम्बिनीको भ्रमण गरेका छन् ।
