वेकामे बन्यो ओखलढुंगा सदरमुकाममा रहेको खाद्य संस्थानको कार्यालय

ओखलढुंगा । ओखलढुंगा सदरमुकाममा रहेको खाद्य संस्थानको कार्यालय वेकामे बनेको छ । स्थानीय व्यापारीहरूले गाउँगाउँमै पुगेर खाद्य सामग्रीको व्यापार गर्न थालेपछि खाद्य संस्थानको कार्यालय वेकामे बनेको हो । नेपाल खाद्य संस्थानको शाखा कार्यालयले ओखलढुंगामा सहुलियत दरमा उपलब्ध गराउँदै आएको चामल पछिल्लो समय बिक्री हुन छाडेपछि वेकामे बनेको हो ।

पछिल्ला वर्षहरुमा जिल्लामा खाद्य संस्थानको चामल बिक्री हुने क्रम घटेपछि यहाँको कार्यालmय काम विहिन बनेको छ । चालु आर्थिक वर्षका लागि ८ सय क्विन्टल चामल ठेक्का लागेकोमा जेठ मसान्तसम्म मुस्किलले ५ सय क्विन्टल मात्रै चामल बिक्री भएको तथ्याकं रहेको छ ।

विगतमा ओखलढुंगामा एक हजार ९ सय क्विन्टलसम्म चामल खपत हुने गरेको जनाइएको छ । सर्वसाधारणलाई सरकारी अनुदानमा खाद्यान्न उपलब्ध गराउनका लागि २०३१ सालमा ओखलढुंगा सदरमुकाममा खाद्य संस्थानको कार्यालय स्थापना भएको थियो । संस्थानले स्टीम जीरा मसिनको चामल प्रतिकेजी ६६ रुपैयाँमा बिक्री गर्दै आएको छ । अरुवा सोना मन्सुली चामलको मूल्य ४९ रुपैयाँ रहेको छ ।