- २७ भाद्र २०८३, शनिबार / Sep 12, 2026
३ भाद्र २०७७ एजेन्सी । मालिका राष्ट्रपति इब्राहिम बुबाकार केयटाले राजीनामाको घोषणा गरेका छन् । सैनिकको कब्जामा परेपछि उनले सैनिक अखाडाबाट त्यस्तो घोषणा गरेको संचारमाध्यमले जनाएका छन् । टेलिभिजन सम्बोधनमा राष्ट्रपति केयटाले सरकार र संसद् पनि भङ्ग गरेको बताएका छन् ।
“म आफूलाई शक्तिमा राखिरहन रगत नबगोस् भन्ने चाहन्छु।” राष्ट्रपति केयटाले भने । उनको त्यस्तो घोषणा उनी र प्रधानमन्त्रीसहित अन्यलाई सैनिकले गिरफ्तार गरेर राजधानी नजिकैको एउटा छाउनीमा लगेपछि आएको हो । सैनिक कू घटनाको क्षेत्रीय सङ्गठन सहित अन्तर्राष्ट्रिय रूपमा भर्त्सना गरिएको छ ।
राष्ट्रपति इब्रहिम केयटालाई सैनिकले गिरफ्तार गरेको सरकारले जनाएको थियो । प्रधानमन्त्री बूबू सीशेलाई पनि सैनिकले पक्राउ गेको छ । मालीको राजधानी बमाकोबाट करिब १५ किलोमिटर टाढा रहेको कटीस्थित एउटा मुख्य सैन्य शिविरमा राखिएको छ । सो स्थानमा मङ्गलवार गोली चलेको थियो । कनिष्ठ सैनिक अधिकृतले त्यहाँका उच्च कमान्डरलाई कब्जामा लिएर छाउनी नियन्त्रणमा लिएपछि विद्रोही सैनिकले राजधानीमा मार्च गरेका छन् ।
उनीहरूलाई राजधानीमा राष्ट्रपतिविरुद्ध प्रदर्शनमा उत्रिएकाहरूले खुसी प्रकट गर्दै स्वागत गरेका थिए। त्यसपछि दिउँसो राष्ट्रपति केयटाको निवासमा सैनिकले धावा बोलेर उनी र त्यहीँ रहेका प्रधानमन्त्रीलाई गिरफ्तार गरेका हुन्। सो घटनाको नेतृत्व कटी सैनिक छाउनीका उपप्रमुख कर्णेल मलिक डिव र अर्का कमान्डर जनरल सादिओ कमाराले गरेको बीबीसी संवाददाता अब्दुल बाले जनाएका छन् ।
