- २१ आश्विन २०८३, बुधबार / Oct 7, 2026
कैलाली । कैलालीको गौरीगंगा –३, कुचैनीस्थित राष्ट्रिय वनबाट सालको काठ तस्करी हुदै गर्दा दुईजनालाई वनका कर्मचारीले पक्राउ गरेका छन् । ढुंगामुनि लुकाएर ल्याउँदै गरेको ५० गोलिया चिरेको काठ ट्रलीसहित कर्मचारीले बरामद गरेका हुन ।
काठ बोकेको ट्याक्टर वडासदस्य निरज चौधरीको रहेको प्रहरीले बताएको छ। यो घटना शुक्रवारको हो । त्यस्तै गौरीगंगा नगरपालिका–७, सुनपाल सामुदायिक वनसँग जोडिएको राष्ट्रिय वनमा ३२ वटा सालका रुख काटिएको र रुख कटानीमा संलग्न भएको आरोपमा सामुदायिक वनका अध्यक्ष, कोषाध्यक्षलगायत १० जनाविरुद्ध अहिले मुद्दा चलिरहेको छ।
यस्तै कञ्चनपुरको शुक्लाफाटा नगरपालिका–१, जनज्योति सामुदायिक वनका अध्यक्ष, सचिव, कोषाध्यक्षलगायत पदाधिकारीलाई काठ तस्करीको आरोपमा डिभिजन वन कार्यालयले पक्राउ गर्दा एक सय क्युफिट काठ बरामद गरेको थियो।
यी प्रतिनिधि घटनामा काठ तस्करीमा सामुदायिक वनका पदाधिकारी, जनप्रतिनिधि तथा राजनीतिक दलसँग आबद्ध व्यक्ति संलग्न रहेका छन्। हरियो वन तस्करीको धन भन्ने उखानमा चरितार्थ भएको छ । कैलाली र कञ्चनपुरमा पछिल्ला दिनमा शक्तिको आडमा वन फँडानी गरी काठ तस्करी भइरहेको स्थानीयवासीले बताईरहेका छन्।
