२२ वर्ष बित्दासम्म पनि हत्याकाण्डको तथ्य बाहिर आउन सकेन

काठमाण्डौ । दरबार हत्याकाण्ड भएको शुक्रबार २२ वर्ष पूरा भएको छ । तत्कालीन राजा वीरेन्द्र शाहको वंश नै नाश हुनेगरी २०५८ साल जेठ १९ गते दरबारभित्र भएको गोलीकाण्डमा राजपरिवारका सबै सदस्यको एकै ठाउँमा हत्या भएको शुक्रबार २२ वर्ष पुगेको हो ।

२२ वर्ष बित्दासम्म पनि हत्याकाण्डको तथ्य अझै बाहिर आउन सकेको छैन । हत्याकाण्ड भएको नारायणहिटी दरबारलाई अहिले सङ्ग्रहालय बनाइएको छ । हत्याकाण्डमा तत्कालीन राजा वीरेन्द्र, रानी ऐश्वर्य, युवराज दीपेन्द्र, अधिराजकुमार निराजन, राजकुमारी श्रुतीसहितको निधन भएको थियो ।

घटनापछि तत्कालीन सरकारद्वारा गठित समितिले छानबिनपछि तयार पारेको प्रतिवेदनले घटना तत्कालीन युवराज दीपेन्द्रबाटै भएको ठहर गरे पनि यसलाई धेरैले विश्वास गरेका छैनन् ।