सार्वजनिक लेखा समिति सभापतिको राजीनामा माग

विराटनगर । संघीय संसदको सार्वजनिक लेखा समितिका सभापति ऋषिकेश पोखरेलको राजीनामा माग गरिएको छ । नेकपा माओवादी केन्द्र कोशी प्रदेश संसदीय दलले पोखरेल सार्वजनिक लेखा समितिको सभापति भएकै कारण सहकारी ठगीको छानबिन प्रभावित भएको भन्दै राजीनामा माग गरेको हो ।

माओवादी संसदीय दलका नेता इन्द्रबहादुर आङ्बोले पोखरेल पत्नी अञ्जलासहित २६ जनालाई प्रतिवादी बनाएर मुद्दा दायर गरिएको जनाएको छ । यो मुद्दामा अञ्जलासहित २५ जना फरार छन् ।

आङ्बोले विहीबार पत्रकार सम्मेलन गर्दै नैतिकताका आधारमा राजीनामा दिएर अनुसन्धानका लागि सहजीकरण गर्न आग्रह गरेका छन् । उनले सहकारी ठगीमा दोषी देखिएकालाई कारवाही गर्नुपर्ने माग गरे ।