- ११ बैशाख २०८३, शुक्रबार / Apr 24, 2026
अफगानिस्तान, भाद्र १६ । अफगानिस्तानमा शक्तिशाली भूकम्प जाँदा ठूलो जनधनको क्षति भएको छ। पूर्वी अफगानिस्तानमा गएराति ६ म्याग्निच्यूडको भूकम्प गएको बीबीसीले जनाएको छ।
पाकिस्तानको सीमा नजिकै स्थानीय समयअनुसार राति ११ बजेर ४७ मिनेटमा आएको भूकम्पमा परी कम्तीमा २० जनाको मृत्यु भएको छ भने १०० जनाभन्दा बढी घाइते भएका छन्।
प्रभावित प्रान्तहरू दुर्गम र कठोर भूभाग भएका कारण मृतक संख्या अझै बढ्न सक्ने अनुमान गरिएको छ। नंगरहार र कुनार प्रान्तका विभिन्न अस्पतालमा घाइतेहरूको उपचार भइरहेको छ।
भूकम्प ८ किमि गहिराइमा गएको र त्यसपछि कम्तीमा तीनवटा परकम्पन (४.५ देखि ५.२ म्याग्निच्यूड) गएको बताइएको छ। यो भूकम्पको धक्का अफगानिस्तानको राजधानी काबुलदेखि पाकिस्तानको राजधानी इस्लामाबादसम्म महसुस गरिएको थियो।
कुनार प्रान्तका प्रहरी प्रमुखका अनुसार भूकम्पपछि बाढी र पहिरोका कारण उद्धार टोली पुग्न गाह्रो भएको छ। त्यस्तै, सरकारी अधिकारी लिबानले दुर्गम पहाडी क्षेत्रमा उद्धार तथा राहत कार्यमा मानवीय संस्थाहरूलाई सहयोग गर्न आग्रह गरेका छन्।
