- २२ श्रावण २०८३, शुक्रबार / Aug 7, 2026
काठमाडौँ, १८ माघ । स्वास्थ्य बीमा बोर्डले बीमामा आबद्ध सबै स्वास्थ्य संस्थालाई बिरामीलाई अनावश्यक रूपमा रिफर नगर्न निर्देशन दिएको छ। बोर्डले हिजो सबै सेवा प्रदायक स्वास्थ्य संस्थालाई परिपत्र जारी गर्दै आफ्नो अस्पतालमा उपलब्ध सेवा हुँदाहुँदै पनि बिरामीलाई अनावश्यक रूपमा अन्यत्र रिफर नगर्न सचेत गराएको हो।
स्वास्थ्य बीमा बोर्डका सूचना अधिकारी विकेश मल्लका अनुसार अनावश्यक रिफर गर्दा बिरामीले दुःख पाउने, अनावश्यक स्वास्थ्य परीक्षण हुने तथा बीमा प्रणालीमाथि अतिरिक्त आर्थिक भार पर्ने भएकाले यस्तो अभ्यास रोक्न निर्देशन दिइएको हो।
बोर्डले यदि कुनै स्वास्थ्य संस्थाले आवश्यक सेवा उपलब्ध गराउन नसक्ने अवस्था भएमा भने रिफर पुर्जी अनिवार्य रूपमा भरी, सेवा सुनिश्चित हुने गरी नजिकको उपयुक्त स्वास्थ्य संस्थामा मात्र बिरामी पठाउनुपर्ने स्पष्ट पारेको छ।
यस्तै, अनावश्यक रिफर गरेको पाइएमा दाबी मूल्याङ्कन तथा रुजुका क्रममा त्यस्ता उपचार खर्च भुक्तानी नगरिने र स्वास्थ्य बीमा नियमावली २०७५ को अनुसूची–८ को दफा ४ (ग) अनुसार सम्बन्धित स्वास्थ्य संस्थाको सम्झौता स्थगन वा रद्द समेत गर्न सकिने बोर्डले चेतावनी दिएको छ।
