अन्नपूर्णमा दुई स्पेनिस नागरिक बेपत्ता, चिप्लिएर खसेको आशंका

काठमाडौं । कास्कीको अन्नपूर्ण गाउँपालिका–९ तिखेढुङ्गाबाट २ स्पेनिस नागरिक बेपत्ता भएका छन् । उल्लेरी हुँदै घोरेपानी जाने क्रममा स्पेनिस नागरिक इरिक कासानोभास र मोलास जुन्का मेसी (महिला) सम्पर्कविहीन भएका हुन् ।

भुरुङदी खोलाको पुल नजिक पर्यटकका दुई झोला आइतबार साँझ बाटोमा बेवारिसे अवस्थामा भेटिएको अन्नपूर्ण गाउँपालिकाका प्रवक्ता भरतमान गुरुङले बताए । सोमबार दिनभर खोजी गरेपनि अवस्था पत्ता लाग्न नसकेको उनको भनाइ छ । पर्यटकलाई भुरुङदी खोलाले बगाएको हुन सक्ने आशंका गरिएको छ ।

आइतबार बिहान पर्यटकले कार्यालयमा नाम दर्ता गराएको एक्याप विरेठाँटी चेकपोष्टका प्रमुख यामबहादुर गुरुङले बताए । बाटोमा झोला राखेर छहरामा फोटो खिच्ने क्रममा खोलामा खसेर बेपत्ता भएको हुन सक्ने आशंका गरिएको छ । गोताखोरको टोलीले अहिले खोलामा खोजी गरिरहेको छ ।