- १५ जेष्ठ २०८३, शुक्रबार / May 29, 2026
काठमाडाैं, १८ वैशाख । आज १३७औँ अन्तर्राष्ट्रिय श्रमिक दिवस अर्थात् मे दिवस विभिन्न कार्यक्रमसहित मनाइँदैछ । श्रमिकहरूको हक, अधिकार र सम्मानको सुनिश्चितताका लागि यो दिवस विश्वभर विशेष रूपमा मनाउने गरिन्छ ।
सन् १८८९ मा फ्रान्सको पेरिसमा सम्पन्न श्रमिक नेताहरूको अन्तर्राष्ट्रिय बैठकले मे १ तारिखलाई विश्व श्रमिक दिवसका रूपमा मनाउने निर्णय गरेको थियो । त्यसयता सन् १८९० देखि हरेक वर्ष यो दिवस मनाउने परम्परा सुरु भएको हो ।
यसअघि सन् १८८६ मा अमेरिकाको सिकागोमा ‘आठ घन्टा काम, आठ घन्टा आराम र आठ घन्टा मनोरञ्जन’ भन्ने नारासहित श्रमिक आन्दोलन भएको थियो । सोही आन्दोलनको सम्झनामा मे दिवस मनाउने प्रचलन विकसित भएको हो ।
उक्त आन्दोलनका क्रममा सिकागोको हेयमार्केट क्षेत्रमा भएको बम विस्फोटपछि प्रहरीले मजदुरमाथि दमन गर्दा सात जनाको ज्यान गएको थियो । त्यसपछि श्रमिक आन्दोलनले श्रम अधिकार स्थापनामा महत्वपूर्ण उपलब्धि हासिल गरेको मानिन्छ ।
नेपालमा पनि मजदुर सङ्गठनहरूले विभिन्न कार्यक्रम आयोजना गरी यो दिवस मनाउँदै आएका छन् । देशमा २००७ सालदेखि मजदुर आन्दोलनसँगै मे दिवस मनाउन थालिएको हो भने २०४६ सालपछि यस दिन सार्वजनिक बिदा दिने प्रचलन सुरु भएको छ ।
