- ३० असार २०८३, मंगलवार / Jul 14, 2026
कालिकोट । केही दिनदेखि बन्द कर्णाली राजमार्ग खुलेको छ । अविरल वर्षाका कारण पहिरो गएपछि बन्द कर्णाली राजमार्गको कालिकोट खण्ड खुलेको हो । कालीकोट खण्डको सडक खुले पनि दही खोलाको पहिरो पन्छाउने काम बाँकी नै रहेकाले कर्णाली राजमार्ग बन्द जस्तै भएको छ ।
दैलेख खण्डको किटु र दही खोलामा पहिरो पन्छाउने काम भइरहेको प्रहरीले जनाएको छ । चार दिनदेखि अवरुद्ध भएको कर्णाली राजमार्गको सुर्खेत–जुम्ला सडकखण्ड अन्तर्गत कालीकोट खण्ड खुलेको हो । गएको बुधवार परेको पानीसँगै आएको बाढी पहिरोले अवरुद्ध भएको हुल्म, एसमोड र गगनेखोलाको पहिरो हटाएपछि कालिकोट खण्ड खुलेको हो ।
कर्णाली राजमार्ग पाँच दिनदेखि अवरुद्ध हुँदा स्याउ बोकेका ट्रक बाटोमा रोकिएका छन् । करोडौँको स्याउ क्षति हुने अवस्थामा पुगेको छ । जुम्लाको स्याउ निर्यात हुने बेलामा भएको सडक अवरोध हटाउन सरकारले ढिलासुस्ती गरेको छ ।
जुम्लामा उत्पादन भएको स्याउ बजार पठाउने बेला सडक अवरुद्ध हुँदा कुहिने जोखिम बढेको किसानले बताएका छन् ।
