भर्खरै : Sorry, your browser does not support inline SVG.
पोखरामा प्यारापाइलट उत्पादन गर्ने पहिलो स्कुल सञ्चालनमा, १ करोड ५० लाख लगानी | भक्तपुर नगरव्यापी विद्यालयस्तरीय खेलकुद प्रतियोगिता सुरु, ८४ विद्यालयका ३२ सयभन्दा बढी विद्यार्थी सहभागी | असोजमा महँगी ६.३७ प्रतिशत पुग्यो, घिउतेल र फलफूलको मूल्य सबैभन्दा धेरै बढ्यो | नक्कली शैक्षिक प्रमाणपत्र प्रयोग गरी बढुवा लिएको आरोपमा अनुसन्धान विभागका अधिकृतविरुद्ध मुद्दा | दुई महिनामा ८८७ व्यावसायिक फर्ममा अनुगमन, ७४ लाई कारबाही | असोजमा रेमिट्यान्सको ऐतिहासिक कीर्तिमान, एकै महिनामा भित्रियो २ खर्ब ६७ अर्ब | नेपाली सेनाको प्रवक्तामा सहायक रथी राजेन्द्र श्रेष्ठ नियुक्त | काठमाडौं विश्वकै तेस्रो प्रदूषित सहर, प्रदूषण नियन्त्रणको कार्ययोजना सार्वजनिक गर्दै महानगर |

बाजुरामा ड्रागन फ्रुटको व्यावसायिक खेती, पाँच रोपनीबाट वार्षिक लाखौँ आम्दानी

बाजुरामा ड्रागन फ्रुटको व्यावसायिक खेती, पाँच रोपनीबाट वार्षिक लाखौँ आम्दानी

मुख्यबुँदा

बाजुरामा पाँच रोपनीमा ड्रागन फ्रुटका १ हजार ४०० बिरुवा ।

तीन वर्षदेखि व्यावसायिक ड्रागन फ्रुटखेती ।

गत वर्ष ६ क्विन्टल बिक्री, यस वर्ष १५ क्विन्टल बिक्री भइसकेको ।

वार्षिक पाँचदेखि छ लाख रुपैयाँसम्म आम्दानी ।

मार्तडीदेखि साँफेबगरसम्म बजार विस्तार ।

उचित व्यवस्थापन गरे एउटा बोटले २५ वर्षसम्म उत्पादन दिन सक्ने ।

बाजुरामा ड्रागन फ्रुटखेतीको सम्भावना प्रशस्त रहेको कृषि ज्ञान केन्द्रको भनाइ ।

बाजुरा, २१ असाेज । बाजुरामा परम्परागत खेतीबाट पर्याप्त आम्दानी गर्न कठिन भइरहेका बेला बूढीगङ्गा नगरपालिका–१० का भोलाराम जैसीले ड्रागन फ्रुटखेतीबाट नयाँ सम्भावना देखाउनुभएको छ ।

तीन वर्षअघि परीक्षणका रूपमा ड्रागन फ्रुटखेती सुरु गर्नुभएका जैसीले अहिले पाँच रोपनी जमिनमा एक हजार ४०० बिरुवा लगाउनुभएको छ । उत्पादन राम्रो हुन थालेपछि उहाँले ड्रागन फ्रुटखेतीलाई आफ्नो आम्दानीको प्रमुख माध्यम बनाउनुभएको हो ।

विसं २०६८ देखि २०७४ सम्म मार्तडीमा होटल व्यवसाय सञ्चालन गर्नुभएका जैसी त्यसपछि गाउँ फर्किनुभएको थियो । गाउँ फर्किएपछि ‘हिमानी बहुउद्देश्यीय कृषि तथा पशुपन्छी फर्म’ दर्ता गरी कुखुरापालन र तरकारीखेती सुरु गर्नुभयो ।

नयाँ र फरक किसिमको व्यावसायिक खेती गर्ने सोच बनाएपछि कृषि ज्ञान केन्द्रका तत्कालीन प्रमुख मीनप्रसाद जैसीको सुझावमा उहाँले अनुदान लिएर ड्रागन फ्रुटखेती सुरु गर्नुभएको हो ।

ड्रागन फ्रुटका बिरुवाले करिब दुई वर्षमै फल दिन थालेपछि उहाँको उत्साह थपिएको छ । गत वर्ष करिब छ क्विन्टल ड्रागन फ्रुट बिक्री गर्नुभएका जैसीले यस वर्ष हालसम्म १५ क्विन्टल बिक्री गरिसक्नुभएको छ । अझै केही फल पाक्ने क्रममा रहेको उहाँले बताउनुभएको छ ।

जेठदेखि फल्न सुरु हुने ड्रागन फ्रुटको मुख्य सिजन असोजसम्म रहने गर्दछ । उत्पादन बिक्रीबाट जैसीले वार्षिक पाँचदेखि छ लाख रुपैयाँसम्म आम्दानी गर्दै आउनुभएको छ । उत्पादित ड्रागन फ्रुट बिक्रीका लागि बजारको समस्या नरहेको उहाँको भनाइ छ । उहाँले मार्तडी बजारसँगै अछामको साँफेबगरसम्म पुर्‍याएर फल बिक्री गर्दै आउनुभएको छ ।

जैसीका अनुसार राम्रो मलजल र उचित व्यवस्थापन गर्न सके एउटा ड्रागन फ्रुटको बोटले २५ वर्षसम्म उत्पादन दिन सक्छ । अन्य बालीको तुलनामा धेरै सिँचाइ आवश्यक नपर्ने भएकाले बाजुराजस्तो क्षेत्रमा समेत यसको व्यावसायिक सम्भावना रहेको उहाँको अनुभव छ ।

ड्रागन फ्रुटखेतीमा सुरुवाती लगानी र मेहनत आवश्यक भए पनि गाईवस्तुको मल प्रयोग गर्न सकिने तथा समय–समयमा काँटछाँट गरे पुग्ने जैसी बताउनुहुन्छ ।

जैसीको खेती अहिले बाजुरामा व्यावसायिक ड्रागन फ्रुटखेतीको उदाहरण बनेको छ । जिल्लामा ठूलो क्षेत्रफलमा ड्रागन फ्रुटखेती गर्ने उहाँ पहिलो कृषक हुनुहुन्छ । अन्य केही स्थानमा पनि खेती सुरु भए पनि अझै व्यावसायिक रूपमा विस्तार हुन सकेको छैन । बाजुरामा ठूलो मात्रामा कृषियोग्य जमिन भए पनि परम्परागत बालीबाट पर्याप्त आम्दानी गर्न चुनौती छ ।

जिल्लाको करिब ८० प्रतिशत खेतीयोग्य जमिनमा अझै सिँचाइ सुविधा पुग्न सकेको छैन । वर्षभरि उत्पादन गरेको अन्नले समेत धेरै परिवारलाई छ महिनासम्म खान नपुग्ने अवस्था रहेको बताइन्छ । कृषि ज्ञान केन्द्रका अनुसार आर्थिक वर्ष २०७९/८० मा जैसीसहित जिल्लाका चार किसानलाई ५० प्रतिशत लागत साझेदारीमा ड्रागन फ्रुटखेती सुरु गर्न सहयोग गरिएको थियो ।

केन्द्रका बागवानी विकास अधिकृत सृष्टि ढुङ्गानाका अनुसार समुद्री सतहबाट १०० देखि एक हजार ५०० मिटर उचाइसम्म ड्रागन फ्रुटखेती गर्न सकिन्छ । नयाँ बाली भएकाले जिल्लामा हाल थोरै किसान मात्रै व्यावसायिक रूपमा यसमा लागेका छन् । तर उचित मेहनत र व्यवस्थापन गर्न सके बाजुरामा ड्रागन फ्रुटखेतीबाट राम्रो आम्दानी गर्न सकिने कृषि ज्ञान केन्द्रको भनाइ छ ।

 


Thali Mobile Pvt.Ltd.