- २० श्रावण २०८३, बुधबार / Aug 5, 2026
भक्तपुर, बालकोट । बहुप्रतीक्षित मेलम्ची खानेपानी अब बालकोटमा पनि पुगेको छ। बालकोट खानेपानी ट्यांकीमा सोमबारदेखि मेलम्चीको पानी संकलनको कार्य औपचारिक रूपमा सुरु भएको हाे ।
उक्त आयोजनाको सफल कार्यान्वयनप्रति बागमती प्रदेश सरकारका स्वास्थ्य मन्त्री किरण थापा, सुर्यविनायक नगरपालिकाका नगरप्रमुख बासुदेव थापा, उपप्रमुख सरिता तिमिल्सिना भट्टराई, वडा नं ७ का अध्यक्ष तथा नगर प्रवक्ता रबिन्द्र सापकोटा, वडा नं २ का अध्यक्ष श्री प्रदीप कार्की, वडा नं ३ का अध्यक्ष दिपेन्द्र के.सी., पूर्व वडा अध्यक्ष कमलनाथ आचार्य लगायत अन्य जनप्रतिनिधिहरूले शुभकामना व्यक्त गरेका छन्।
आयोजनामा बागमती प्रदेश सरकारबाट १ करोड र सुर्यविनायक नगरपालिका तथा स्थानीय उपभोक्ताको साझेदारी गरी जम्मा ८ करोड रुपैयाँ लागतमा सम्पन्न गरिएको हो। बालकोट खानेपानी समिति, बालकोट ढल निर्माण तथा सरसफाइ उपभोक्ता समितिको समेत विशेष योगदान रहेको आयोजकले जानकारी दिएका छन्।
स्थानीयवासीहरू लामो समयदेखि खानेपानी अभावमा रहेका बालकोट क्षेत्रमा मेलम्चीको पानी प्रवेशसँगै ठूलो राहत मिल्ने विश्वास गरिएको छ। मन्त्री थापाले बालकोटवासीलाई यसपालीदेखि नै पानी वितरण हुने प्रतिबद्धता व्यक्त गर्नुभएको छ।
स्थानीय बासिन्दाहरूले अब पानीको न्यायिक, समान र नियमित वितरणको सम्बन्धित निकायलाई आग्रह गरेका छन्।
