- २६ असार २०८३, शुक्रबार / Jul 10, 2026
काठमाडौँ, २ फागुन । प्रतिनिधिसभा सदस्य निर्वाचनका लागि मतपत्र छपाइको काम अन्तिम चरणमा पुगेको छ। निर्वाचन आयोगका अनुसार अब काठमाडौँ उपत्यकासहित आसपासका १४ जिल्लाको निर्वाचन क्षेत्रका मतपत्र छपाइ गर्न बाँकी रहेको छ।
भक्तपुरस्थित जनक शिक्षा सामग्री केन्द्रमा नियमित रूपमा मतपत्र छपाइ भइरहेको आयोगले जनाएको छ। हालसम्म ६३ जिल्लाका १ सय ३३ निर्वाचन क्षेत्रको मतपत्र छपाइ सम्पन्न भइसकेको छ।
आयोगका सहायक प्रवक्ता प्रकाश न्यौपानेका अनुसार हालसम्म एक करोड ७१ लाख ६३ हजार मतपत्र छपाइ सम्पन्न भइसकेको छ। छापिएका जिल्लाका मतपत्र प्याकिङको काम पनि जारी छ। अहिलेसम्म १५ हजार ३ सय ७१ बाकस मतपत्र प्याकिङ गरिसकिएको छ।
आयोगका अनुसार दैनिक करिब एक हजार बाकस मतपत्र प्याकिङ तथा ११ देखि १५ लाखसम्म मतपत्र छपाइ भइरहेको छ। प्रत्यक्षतर्फ कुल दुई करोड तीन लाख २३ हजार मतपत्र छाप्नुपर्ने लक्ष्य रहेको आयोगले जनाएको छ। निर्वाचन नजिकिँदै जाँदा आवश्यक तयारी तीव्र रूपमा अघि बढाइएको आयोगले स्पष्ट पारेको छ।
