- ८ भाद्र २०८३, सोमबार / Aug 24, 2026
भक्तपुर अस्पतालमा स्वास्थ्यकर्मीमाथि भएको आक्रमणको चिकित्सक सङ्घद्वारा भर्त्सना।
अस्पतालभित्र तोडफोड र चिकित्सकमाथि हातपात भएको आरोप।
दोषीलाई स्वास्थ्यकर्मी सुरक्षा ऐनअनुसार कडा कारबाही गर्न माग।
स्वास्थ्य क्षेत्रमा शून्य सहनशीलताको नीति लागू गर्न जोड।
स्वास्थ्यकर्मीको सुरक्षा सुनिश्चित गर्न सरकारसँग आग्रह।
काठमाडौँ, १६ साउन । नेपाल चिकित्सक सङ्घले भक्तपुर अस्पतालमा कार्यरत चिकित्सक तथा स्वास्थ्यकर्मीमाथि भएको आक्रमण र अस्पतालभित्र गरिएको तोडफोडको घटनाप्रति गम्भीर ध्यानाकर्षण भएको जनाएको छ।
सङ्घले उक्त घटनाको कडा शब्दमा भर्त्सना गर्दै संलग्न व्यक्तिमाथि कानुनबमोजिम कडा कारबाही गर्न सरकारसँग माग गरेको छ। सङ्घका अनुसार सघन उपचार कक्ष (आईसीयू) मा बिरामी भर्ना नगरिएको विषयलाई लिएर अस्पताल परिसरमा तोडफोड गर्नुका साथै चिकित्सक र स्वास्थ्यकर्मीमाथि हातपात गरिएको थियो।
यस्ता गतिविधि अमानवीय, अमर्यादित र आपराधिक भएको सङ्घको ठहर छ। नेपाल चिकित्सक सङ्घले दोषीलाई ‘स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (पहिलो संशोधन, २०७९)’ बमोजिम अविलम्ब कडा कारबाही गर्न सम्बन्धित निकायसँग माग गरेको छ।
सङ्घले स्वास्थ्य संस्था र स्वास्थ्यकर्मीमाथि हुने आक्रमणका घटना बढ्दै गएको भन्दै स्वास्थ्य क्षेत्रमा शून्य सहनशीलताको नीति लागू गर्नुपर्ने आवश्यकता औँल्याएको छ। साथै, स्वास्थ्यकर्मीलाई त्रसित वा आतंकित बनाउने जो–कोहीलाई कडा कानुनी कारबाहीको व्यवस्था गरी त्यसको प्रभावकारी कार्यान्वयन गर्न सरकारसँग आग्रह गरिएको छ।
हाल उक्त ऐन संशोधनको प्रक्रिया अघि बढिरहेको उल्लेख गर्दै सङ्घले संशोधित कानुनमार्फत स्वास्थ्य संस्था र स्वास्थ्यकर्मीको सुरक्षा अझ प्रभावकारी बनाउनुपर्नेमा जोड दिएको छ। यो माग नेपाल चिकित्सक सङ्घका अध्यक्ष डा. बद्री रिजाल र महासचिव डा. विश्वराज दवाडीद्वारा संयुक्त रूपमा जारी गरिएको विज्ञप्तिमार्फत सार्वजनिक गरिएको हो।
