- ८ भाद्र २०८३, सोमबार / Aug 24, 2026
काठमाडौँ, १६ साउन । अख्तियार दुरुपयोग अनुसन्धान आयोगले जग्गा बकसपत्र गराउने क्रममा सेवाग्राहीसँग घुस लिएको आरोपमा भूमि प्रशासन कार्यालय, लगनखेल (ललितपुर) का तीन नायब सुब्बा (नासु) सहित पाँच जनालाई पक्राउ गरेको छ।
अख्तियारका अनुसार पक्राउ पर्नेमा भूमि प्रशासन कार्यालयका उत्तम कुँवर, विशाल सुन्दास र राजकुमार मगर रहेका छन्। उनीहरूसँगै लेखापढी व्यवसायी शैलेन्द्र रानामगर र समिर कटवाललाई पनि नियन्त्रणमा लिइएको छ।
अख्तियारका प्रवक्ता सुरेश न्यौपानेका अनुसार उनीहरूको साथबाट ३ लाख रुपैयाँ घुस रकम बरामद गरिएको छ। साथै, स्रोत खुल्न नसकेको २४ हजार ८ सय ९० रुपैयाँ समेत फेला परेको जनाएको छ।
प्रारम्भिक अनुसन्धानअनुसार जग्गाको बकसपत्र गराउने काममा सेवाग्राहीलाई अनावश्यक दुःख र हैरानी दिई घुस मागिएको आरोपमा उनीहरूलाई पक्राउ गरिएको हो।
अख्तियारको टोलीले उनीहरूलाई ललितपुरस्थित एक होटलबाट नियन्त्रणमा लिएको हो। पक्राउ परेका सबैमाथि भ्रष्टाचार तथा घुस लेनदेनसम्बन्धी थप अनुसन्धान भइरहेको आयोगले जनाएको छ।
