- २६ असार २०८३, शुक्रबार / Jul 10, 2026
भक्तपुर, २ माघ । बाग्मती प्रदेशभित्र उत्कृष्ट अस्पतालका रूपमा चिनिएको भक्तपुर अस्पतालमा अत्याधुनिक नयाँ भवन निर्माण गरिने भएको छ। बाग्मती प्रदेश सरकारको प्राथमिकतामा परेको यस परियोजनाअन्तर्गत करिब ६२ करोड रुपैयाँको लागतमा नयाँ भवन निर्माण गरिने भएकाे हाे ।
शुक्रबार बाग्मती प्रदेशका स्वास्थ्य मन्त्री किरण थापा, संस्कृति तथा पर्यटन मन्त्री सुरेश श्रेष्ठ, स्वास्थ्य सचिव डा. सुमित्रा गौतमलगायतको उपस्थितिमा प्रस्तावित नयाँ भवनको विस्तृत परियोजना प्रतिवेदन (DPR) माथि विस्तृत छलफल भएको हो।
बैठकमा भवनको डिजाइन, सेवा विस्तार, लागत व्यवस्थापन र निर्माण समयसीमाबारे समीक्षा गरिएको थियो।
नयाँ भवनमा अत्याधुनिक आकस्मिक कक्ष, आइसियु, एनआइसियु, प्रसूति तथा स्त्रीरोग विभाग, सर्जरी ब्लक, आधुनिक प्रयोगशाला, डिजिटल एक्स–रे, सिटी स्क्यान, एमआरआई जस्ता प्रविधियुक्त सेवा विस्तार गर्ने योजना रहेकाे छ। साथै, बिरामी र सेवाग्राहीलाई सहज हुने गरी प्रतीक्षालय, अपाङ्गमैत्री संरचना, लिफ्ट, पार्किङ तथा हरित क्षेत्रको समेत व्यवस्था गरिने भएकाे छ।
स्वास्थ्य मन्त्री किरण थापाले भक्तपुर अस्पताललाई बाग्मती प्रदेशकै नमुना अस्पताल बनाउने लक्ष्यसहित योजना अघि बढाइएको बताउनुभयाे भने, “नयाँ भवन निर्माणपछि यहाँको सेवा क्षमतामा गुणात्मक र मात्रात्मक दुवै रूपमा वृद्धि हुनेछ। स्थानीय मात्र होइन, काभ्रेपलाञ्चोक, काठमाडौं र ललितपुरका बिरामीहरूलाई पनि ठूलो राहत मिल्नेछ।” उहाँले भन्नु भयाे ।
संस्कृति तथा पर्यटन मन्त्री सुरेश श्रेष्ठले स्वास्थ्य पूर्वाधारमा गरिएको लगानीले दीर्घकालीन सामाजिक र आर्थिक फाइदा दिने उल्लेख गर्दै निर्माण प्रक्रियामा पारदर्शिता र गुणस्तरमा कुनै सम्झौता नहुने प्रतिबद्धता जनाउनुभयाे ।
स्वास्थ्य सचिव डा. सुमित्रा गौतमले DPR अनुसार निर्माण कार्य चरणबद्ध रूपमा अघि बढाइने, तोकिएको समयसीमाभित्र सम्पन्न गर्ने लक्ष्य राखिएको जानकारी दिनुभयाे । गाैतमका अनुसार वातावरणमैत्री प्रविधि, भूकम्प प्रतिरोधी डिजाइन र अन्तर्राष्ट्रिय मापदण्डअनुसार र भक्तपुरकाे पुरानाे शैलीमा भवन निर्माण गरिने र मुटु तथा न्यूराे सम्बन्धी सेवा समेत विस्तार गरिने बताउनुभयाे ।
स्थानीय जनप्रतिनिधि, अस्पताल व्यवस्थापन समिति र स्वास्थ्यकर्मीहरूले यस योजनालाई ऐतिहासिक उपलब्धिका रूपमा लिँदै नयाँ भवन निर्माणपछि भक्तपुर अस्पताल प्रदेशकै प्रमुख रेफरल अस्पतालको रूपमा स्थापित हुने विश्वास व्यक्त गरेका छन्।
