- २९ भाद्र २०८३, सोमबार / Sep 14, 2026
काठमाडौं, २९ भदौ । भोटेकोशी र आसपासका क्षेत्रमा आएको बाढीबाट कृषि तथा पशुधन क्षेत्रमा ठूलो क्षति पुगेको प्रारम्भिक मूल्याङ्कनले देखाएको छ । राष्ट्रिय योजना आयोग र राष्ट्रिय विपद् जोखिम न्यूनीकरण तथा व्यवस्थापन प्राधिकरणले तयार पारेको प्रारम्भिक मूल्याङ्कन प्रतिवेदनअनुसार बाढीका कारण विशेषगरी धान, तरकारी तथा पशुपक्षी क्षेत्रमा व्यापक क्षति भएको हो ।
प्राप्त विवरणअनुसार बाढी प्रभावित विभिन्न पालिकामा १ हजार ६६९ हेक्टर क्षेत्रफलको धानखेती नष्ट भएको छ । यसबाट करिब ५ हजार ८४३ टन धान उत्पादनमा क्षति पुगेको अनुमान गरिएको छ । त्यस्तै, १३७ हेक्टर क्षेत्रफलको तरकारी खेती प्रभावित भएको छ । बाढीका कारण करिब १ हजार ८४३ टन तरकारी नष्ट भएको प्रतिवेदनमा उल्लेख छ ।
भौगोलिक रूपमा नुवाकोटको विदुर, लिखु र बेलकोटगढी नगरपालिका तथा धादिङ, गोरखा र रसुवाका विभिन्न स्थानीय तह बाढीबाट बढी प्रभावित भएका छन् । नुवाकोटको विदुर नगरपालिकामा मात्रै ७०० हेक्टर धानखेती र ९८ हेक्टर तरकारी खेतीमा क्षति पुगेको छ ।
कृषिबाहेक पशुधनतर्फ पनि ठूलो क्षति भएको छ । प्रारम्भिक मूल्याङ्कनअनुसार पशुधनमा मात्रै १ अर्ब ११ करोड ३९ लाख रुपैयाँ बराबरको क्षति भएको अनुमान गरिएको छ । बाढीका कारण २ लाख ५२ हजारभन्दा बढी पशुपक्षी प्रभावित भएका छन् । त्यसमध्ये ४ हजार ५७२ भैँसी मर्दा ४५ करोड ७२ लाख रुपैयाँ बराबरको क्षति भएको छ ।
बाख्रा तथा च्याङ्ग्रातर्फ ३९ करोड १३ लाख रुपैयाँ र गाईगोरुतर्फ १७ करोड ९२ लाख रुपैयाँ बराबरको क्षति भएको प्रतिवेदनमा उल्लेख छ ।सङ्ख्याका आधारमा २ लाख १४ हजारभन्दा बढी कुखुरा प्रभावित भएका छन् । तर आर्थिक क्षतिको हिसाबले भैँसी, बाख्रा, च्याङ्ग्रा र गाईगोरुको हिस्सा मात्रै ९२ प्रतिशतभन्दा बढी रहेको जनाइएको छ ।
बाढीबाट कृषि तथा पशुधनमा भएको क्षतिले ग्रामीण क्षेत्रका किसानको आम्दानीमा प्रत्यक्ष असर पारेको छ । कृषि उत्पादन तथा पशुधन गुमाउँदा स्थानीय अर्थतन्त्रमा समेत गम्भीर प्रभाव परेको प्रारम्भिक मूल्याङ्कन प्रतिवेदनले देखाएको छ ।
