भारतको बिहार राज्यमा विधानसभा चुनावको पहिलो चरणको मतदान सम्पन्न

एजेन्सी, २१ कार्तिक।  भारतको बिहार राज्यमा भएको विधानसभा चुनावको पहिलो चरणको मतदान सम्पन्न भएको छ।भारतीय निर्वाचन आयोगका अनुसार विहारका १८ जिल्लामा पर्ने १२१ विधानसभा क्षेत्रमा मतदान सम्पन्न भएको हो।

बीबीसी हिन्दीका अनुसार यस चरणमा करिब तीन करोड ७५ लाखभन्दा बढी मतदाताले मतदान गरेका छन्। बिहार निर्वाचन आयोगले दिएको विवरणअनुसार राति सवा आठ बजेसम्मको अवस्थाअनुसार कुल ६४.६६ प्रतिशत मतदान भएको छ।

यो अघिल्ला विधानसभा चुनावहरूको तुलनामा सबैभन्दा बढी मतदाताको सहभागिता भएको जनाइएको छ। केही साना विवादका घटना बाहेक अधिकांश मतदान केन्द्रमा शान्तिपूर्ण रूपमा मतदान सम्पन्न भएको खबरमा उल्लेख गरिएको छ।