बलात्कार आरोपमा श्रीमान पक्राउ, दुई जना फरार

हेटौंडा । मकवानपुर मनहरी गाउँपालिकामा ५० वर्षीया एक महिलामाथि सामूहिक बलात्कार भएको छ । पीडित महिलाले दिएको उजुरीका आधारमा उनका श्रीमान पक्राउ परेका छन् । असोज ३० गते मनहरी गाउँपालिका–५, स्थित आफ्नै घरमा ती महिलामाथि उनका श्रीमान र दुई अन्य किशोरले सामूहिक बलात्कार गरेको महिलाले उजुरीमा उल्लेख गरेकी छन् ।

रातको समयमा ६० वर्षीय श्रीमान र १९, २० वर्षका दुई युवाले आफूमाथि सामूहिक बलात्कार गरेको उनले बताएकी छन् । प्रहरीले श्रीमानलाई पक्राउ गरेर शुक्रबार मकवानपुर जिल्ला अदालतबाट ५ दिनको म्याद थप गरेको छ भने आरोपित दुई युवा फरार रहेका छन् । पीडित महिलाले दुई किशोरको उमेर १९ र २० वर्ष हुनसक्ने बताएको प्रहरी नायव उपरीक्षक श्यामु अर्यालले बताए ।

डीएसपी अर्यालले भने, ‘महिलाले श्रीमानसहित दुई जना किशोरले बलात्कार गरेको बताउनुभएको छ । किशोरहरुलाई आफू नचिन्ने बताउनुभएको छ । दोषी पत्ता लगाउन हामीले घटनाको सुक्ष्म अनुसन्धान गरिरहेका छौं ।’ अहिले पीडित महिलालाई हेटौंडास्थित महिला सेफ हाउसमा राखिएको छ । स्वास्थ्य अवस्था ठीक रहेको डिएसपी अर्यालले बताए ।