- २९ श्रावण २०८३, शुक्रबार / Aug 14, 2026
काठमाण्डौ, २३ बैशाख । रुपन्देहीको सिद्धार्थनगरस्थित एक क्यासिनोमा जुवातास खेलिरहेका १९ जना नेपाली नागरिकलाई प्रहरीले पक्राउ गरेको छ।
लुम्बिनी प्रदेश प्रहरी कार्यालय र जिल्ला प्रहरी कार्यालय रुपन्देहीको संयुक्त टोलीले सिद्धार्थनगर नगरपालिका–१० मा रहेको होटल गौतमबुद्ध इन्टरनेसनल भित्र सञ्चालित ‘रोयल कालिङ्गा क्यासिनो’मा गएराति छापा मारेर उनीहरूलाई पक्राउ गरेको हो।
जिल्ला प्रहरी कार्यालय रुपन्देहीका सूचना अधिकारी प्रहरी नायब उपरीक्षक कृष्णकुमार चन्दका अनुसार पक्राउ पर्नेमा क्यासिनो व्यवस्थापनमा संलग्न चार जना र जुवातास खेलिरहेका १५ जना रहेका छन्।
प्रहरीले उनीहरूको साथबाट ९५ हजार ५०० रुपैयाँ नगद, १७ थान मोबाइल फोन र ५० थान क्यासिनो क्वाइन बरामद गरेको जनाएको छ। घटनाबारे थप अनुसन्धान भइरहेको प्रहरीले जानकारी दिएको छ।
