- १८ श्रावण २०८३, सोमबार / Aug 3, 2026
काठमाडौं, १८ साउन । जिल्ला प्रशासन कार्यालय चितवनले अप्ठेरोमा परेका नागरिकलाई घरमै खाना पकाउने ग्यास (एलपी ग्यास) उपलब्ध गराउने व्यवस्था गरेको छ।
ग्यास उद्योगी तथा डिलरसँग भएको छलफलपछि एकल महिला, ज्येष्ठ नागरिक, अपाङ्गता भएका व्यक्ति, छात्रावासमा बस्ने विद्यार्थी तथा आश्रमहरूलाई डिलर र सब–डिलरमार्फत घरमै ग्यास पुर्याउने निर्णय गरिएको जिल्ला प्रशासन कार्यालयले जनाएको छ।
प्रशासनले ग्यास अभाव भएको जानकारी प्राप्त भएमा प्रमुख जिल्ला अधिकारी वा जिल्ला प्रशासन कार्यालयको टोल–फ्री नम्बरमा सम्पर्क गर्न आग्रह गरेको छ।
प्रमुख जिल्ला अधिकारी गणेश अर्यालले जिल्लामा ग्यास अभाव भएको भन्ने चर्चा भए पनि आवश्यक परेकालाई सहज रूपमा ग्यास उपलब्ध गराउने व्यवस्था मिलाइएको जानकारी दिए।
चितवनमा बाबा ग्यास, साइबाबा ग्यास र नेपाल ग्यास उद्योग सञ्चालनमा रहेका छन् भने गैँडाकोटस्थित जानकी ग्यासको बजार क्षेत्र पनि चितवन रहेको छ। चारै ग्यास उद्योगका सञ्चालकले विगतको तुलनामा अहिले ग्यास अभाव नहुने र आपूर्ति नियमित रहने प्रतिबद्धता व्यक्त गरेका छन्।
