- २१ भाद्र २०८३, आईतवार / Sep 6, 2026
धनगढी, २९ जेठ । दार्चुलामा नेपालबाट भारततर्फ अवैध रूपमा निकासी गर्न लागिएको ठूलो परिमाणको झ्याउ प्रहरीले बरामद गरेको छ । घटनामा संलग्न रहेको आरोपमा चार जनालाई पक्राउ गरिएको प्रहरीले जनाएको छ ।
जिल्ला प्रहरी कार्यालय दार्चुलाका अनुसार विशेष सूचनाको आधारमा दुहुँ गाउँपालिका–३ स्थित कालीगाड क्षेत्रमा निगरानी गर्ने क्रममा ३९ बोरा झ्याउ बरामद गरिएको हो । उक्त झ्याउ महाकाली नदी किनार हुँदै भारततर्फ लैजान लागिएको अवस्थामा फेला परेको प्रहरीले जनाएको छ ।
प्रहरीले घटनास्थलबाट दुहुँ गाउँपालिका–४ निवासी ४१ वर्षीय पवनसिंह कार्की, ४२ वर्षीय रमेशसिंह कार्की, ४१ वर्षीय गोर्खसिंह कार्की र ३२ वर्षीय शैलेन्द्रसिंह कार्कीलाई पक्राउ गरेको छ । बरामद गरिएको झ्याउको कुल तौल १ हजार ३६८ किलोग्राम रहेको छ। यसको अनुमानित बजार मूल्य करिब ३ लाख ४२ हजार रुपैयाँ रहेको प्रहरीको भनाइ छ ।
प्रहरीले बरामद गरिएको अवैध वन पैदावार आवश्यक कानुनी प्रक्रिया पूरा गरी अपि–नम्पा संरक्षण क्षेत्र कार्यालयको जिम्मा लगाएको जनाएको छ । घटनाबारे थप अनुसन्धान जारी रहेको र अवैध वन पैदावार ओसारपसारमा संलग्न अन्य व्यक्तिको समेत खोजी भइरहेको प्रहरीले जानकारी दिएको छ ।
