- २९ जेष्ठ २०८३, शुक्रबार / Jun 12, 2026
काठमाडौं, २९ जेठ । नेपाली बजारमा शुक्रबार सुनको मूल्यमा उल्लेखनीय वृद्धि भएको छ । नेपाल सुनचाँदी व्यवसायी महासंघका अनुसार आज सुनको भाउ प्रतितोला ५ हजार ३ सय रुपैयाँले बढेर २ लाख ९२ हजार रुपैयाँ कायम भएको छ ।
बिहीबार प्रतितोला २ लाख ८६ हजार ७ सय रुपैयाँमा कारोबार भएको सुन शुक्रबार बढेर नयाँ मूल्यमा पुगेको हो । यद्यपि, साप्ताहिक आधारमा हेर्दा सुनको मूल्य अझै पनि घट्दो अवस्थामा रहेको देखिन्छ । गत शुक्रबार सुनको मूल्य प्रतितोला ३ लाख ९ हजार रुपैयाँ रहेको थियो । त्यसको तुलनामा एक सातामै सुनको भाउ १७ हजार रुपैयाँले घटेको महासंघको तथ्यांकले देखाएको छ ।
यसैबीच, चाँदीको मूल्यमा पनि वृद्धि भएको छ । शुक्रबार चाँदीको भाउ प्रतितोला १९० रुपैयाँले बढेर ४ हजार ८४० रुपैयाँ कायम भएको छ । अघिल्लो दिन चाँदी प्रतितोला ४ हजार ६५० रुपैयाँमा कारोबार भएको थियो । साप्ताहिक तुलना गर्दा चाँदीको मूल्यमा पनि गिरावट देखिएको छ । गत शुक्रबार प्रतितोला ५ हजार २३० रुपैयाँमा कारोबार भएको चाँदी अहिले सो मूल्यभन्दा कम दरमा कारोबार भइरहेको छ ।
अन्तर्राष्ट्रिय बजारमा बहुमूल्य धातुको मूल्यमा आएको उतारचढावको प्रभाव नेपाली बजारमा समेत परेको व्यवसायीहरू बताउँछन् ।
