गेस्ट हाउसमा अचेत भेटिएकी युवतीको मृत्यु

ललितपुर । ग्वार्कोस्थित एक गेस्ट हाउसमा अचेतावस्थामा फेला परेकी युवतीको उपचारका क्रममा मृत्यु भएको छ । ललितपुर महानगरपालिका–७ ग्वार्कोस्थित सनलाइट गेष्ट हाउसमा शुक्रबार बिहान अचेत अवस्थामा फेला परेकी थिइन् ।

उनी गोदावरी नगरपालिका ८ डुकुछाप घर भई हाल सातदोबाटो बस्दै आएका एक युवकसँग बुधबार गेस्ट हाउस पुगेकी थिइन् । बिहानको समयमा युवती बेहोस भएपछि उपचारका लागि बी एण्ड बी अस्पतालमा लगिएको थियो ।

उपचारकै क्रममा उनको मृत्यु भएको ललितपुर प्रमुख एसपी नरेशराज सुवेदीले बताए । युवतीसँगै रहेका युवकको पनि श्वास प्रश्वासमा समस्या आएको बताएपछि निगरानीमा बी एन्ड बी अस्पतालमै उपचार भइरहेको छ । घटनाबारे थप अनुसन्धान भइरहेको छ ।