धुम्रपान गर्नेको दाँत यस्तै हुन्छ

काठमाडौं । धुम्रपानको लत लागेको त छैन ? अब छोड्नुस् । फोक्सो मात्रै हैन मुख, दाँत गिजा, गाला, घाँटी, श्वास नलीसहितका अंगमा यसले नराम्ररी खाइदिन्छ । धुम्रपानले सबैभन्दा पहिले मुखमा असर गर्छ । सुर्तीजन्य पदार्थमा हुने हानिकारक रसायनले दाँत र मुख स्वास्थ्य बिगार्दै लैजान्छ ।

चुरोट अत्याधिक पिउँदा धुँवा र त्यसमा हुने अन्य रसायनले दाँतमा दागहरु बस्दै जान्छ । दाँत कीराले खान्छ। धुम्रपानले मुखमा थुक उत्पादन कम हुन्छ जसले मुख सुख्खा हुनुका साथै दाँतमा कीरा लाग्ने सम्भावना धेरै हुन्छ । एउटा स्वस्थ मानिसको मुखमा दैनिक डेढ लिटरसम्म थुक उत्पादन हुन्छ ।

थुक उत्पादनमा कमी भएपछि प्राकृतिक रुपमा मुख सफा हुन पाउँदैन र विभिन्न समस्या निम्त्याउँछ । चुरोटमा निकोटिन र तातोपनले बिस्तारै गिजामा समस्या ल्याउँछ। धुम्रपान गर्दा निस्कने रसायनले मुख सुक्खा भई फोहोर हुने र ब्याक्टेरियाले बिस्तारै गिजामा संक्रमण भई दुख्ने, रगत आउने, पाक्ने र सुन्निने हुनसक्छ। संक्रमण बढ्दै गए दाँत झर्ने हल्लिएर झर्नेसम्म हुन सक्छ।