- २४ श्रावण २०८३, आईतवार / Aug 9, 2026
एक वर्षमा ३७ हजार ५२० पर्यटक ढोरपाटन पुगे।
तीमध्ये ३७ हजार २७० नेपाली पर्यटक।
एक वर्षमा पर्यटकको सङ्ख्या करिब १३ हजारले वृद्धि।
आव २०८२/८३ मा प्रवेश शुल्कबाट ४७ लाख ६८ हजार ४०५ रुपैयाँ राजस्व।
ढुङ्गा, गिट्टी र बालुवाबाट १ करोड १ लाख २७ हजार ९५३ रुपैयाँ राजस्व।
बुकीपाटन, जलजला, बुकीफूल तथा पदयात्राले पर्यटक आकर्षण बढाएको छ।
ढोरपाटन उपत्यका, निशेलढोर र ढोरबराह मन्दिरमा आन्तरिक पर्यटकको आकर्षण बढेको छ।
पर्यटकका लागि पालसहित बस्ने व्यवस्था समेत गरिएको छ।
बागलुङ, २४ साउन। नेपालको एकमात्र सिकार आरक्ष क्षेत्र ढोरपाटनमा पर्यटकको आगमन पछिल्लो समय बढ्दै गएको छ। एक वर्षमा ३७ हजार ५२० पर्यटक ढोरपाटन पुगेका छन्। तीमध्ये अधिकांश आन्तरिक पर्यटक रहेको ढोरपाटन सिकार आरक्ष कार्यालय, बागलुङले जनाएको छ।
आरक्ष कार्यालयका रेञ्जर सागर सुवेदीका अनुसार एक वर्षमै ढोरपाटन पुग्ने पर्यटकको सङ्ख्या १३ हजारभन्दा बढीले बढेको छ। पर्यटकीय पूर्वाधार निर्माण, प्रचारप्रसार तथा व्यवस्थित होटल र घरबास (होमस्टे)को विकासका कारण पर्यटकको सङ्ख्या वर्षेनी बढिरहेको उनले बताए।
आर्थिक वर्ष २०८२/८३ मा ढोरपाटन पुगेका ३७ हजार ५२० पर्यटकमध्ये ३७ हजार २७० नेपाली रहेका छन्। बाँकी विदेशी तथा सार्क राष्ट्रका पर्यटक रहेका छन्। आरक्ष कार्यालयका अनुसार आव २०८१/८२ मा २३ हजार ६९२ र आव २०८०/८१ मा १५ हजार ५७३ पर्यटक ढोरपाटन पुगेका थिए।
पर्यटकबाट ४७ लाखभन्दा बढी राजस्व
पर्यटकको सङ्ख्या बढेसँगै ढोरपाटनबाट सङ्कलन हुने राजस्वसमेत बढेको छ। आव २०८२/८३ मा पर्यटक प्रवेश शुल्कबाट ४७ लाख ६८ हजार ४०५ रुपैयाँ राजस्व सङ्कलन भएको छ। त्यसको अघिल्लो आर्थिक वर्ष २०८१/८२ मा पर्यटक प्रवेश शुल्कबाट ३१ लाख २१ हजार ५०० रुपैयाँ सङ्कलन भएको थियो।
आरक्ष कार्यालयका रेञ्जर सुवेदीका अनुसार ढोरपाटन क्षेत्रको प्रचारप्रसार, पर्यटकीय पूर्वाधारको विस्तार, बुकीपाटनको चर्चा तथा जलजलामा पदयात्रा गर्ने पर्यटकको सङ्ख्या बढेका कारण पर्यटक आगमनमा वृद्धि भएको हो।
पर्यटक सूचना प्रणालीको विकास, पर्यटन पदमार्गको रुट कायम तथा पूर्वाधार विस्तारले पनि ढोरपाटनको प्रचारप्रसारमा सहयोग पुगेको उनले बताए।
ढोरपाटन प्रवेश शुल्क कति?
आरक्ष कार्यालयले नेपाली तथा आन्तरिक पर्यटकका लागि १०० रुपैयाँ प्रवेश शुल्क लिँदै आएको छ। त्यस्तै सार्क राष्ट्रका पर्यटकलाई १ हजार ५०० रुपैयाँ र अन्य विदेशी पर्यटकलाई ३ हजार रुपैयाँ प्रवेश शुल्क तोकिएको छ। यसैगरी ढोरपाटनमा ढुङ्गा, गिट्टी तथा बालुवाबाट आव २०८२/८३ मा १ करोड १ लाख २७ हजार ९५३ रुपैयाँ राजस्व सङ्कलन भएको छ। यो अघिल्लो आर्थिक वर्षको तुलनामा ४६ लाख ४१ हजार रुपैयाँ बढी हो।
बुकीपाटन र जलजलाले बढायो आकर्षण
रेञ्जर सुवेदीका अनुसार ढोरपाटनको आकर्षण पछिल्लो समय देशभर फैलिँदै गएको छ। पर्यटकीय पूर्वाधार थपिनु, बुकीपाटन, बुकीफूल र जलजलाको चर्चा तथा पदयात्रीको रोजाइमा पर्नुका साथै होटल र होमस्टेको व्यवस्थापनले पर्यटक आगमन बढाउन सहयोग गरेको छ।
पहिले ढोरपाटनमा मुख्यतः सिकार खेल्न विदेशी पर्यटक आउने गरे पनि पछिल्लो समय ढोरपाटन उपत्यका, निशेलढोर, ढोरबराह मन्दिर, बुकीपाटन र जलजला लगायतका क्षेत्र अवलोकन गर्न आन्तरिक पर्यटकको आगमन बढेको छ।
समुद्री सतहबाट करिब २ हजार ९०० मिटर उचाइमा रहेको ढोरपाटन उपत्यकादेखि ४ हजार मिटरभन्दा माथिको बुकीपाटनसम्म पर्यटक पुग्न थालेका छन्। पर्यटकका लागि शुल्क तिरेर पालसहित बस्न सकिने व्यवस्था समेत मिलाइएको आरक्ष कार्यालयले जनाएको छ।
