- ४ जेष्ठ २०८३, सोमबार / May 18, 2026
काठमाडौं, २१ फागुन । दोलखाको तामाकोशी गाउँपालिका–४ स्थित गोल्मेश्वर माध्यमिक विद्यालय मतदान केन्द्रमा रोकिएको मतदान पुनः सुरु गर्ने विषयमा सर्वदलीय सहमति भएको छ ।
मतदान स्थलमा भएको विवादका कारण केहीबेर रोकिएको मतदान पुनः सञ्चालन गर्ने निर्णय सर्वदलीय बैठकले गरेको बागमती प्रदेश प्रहरी कार्यालयका डीआईजी दिपक रेग्मीले जानकारी दिएका छन् । मतदान केन्द्रमा खटिएका कर्मचारीमाथि एक समूहले हातपात गर्न खोजेपछि अवस्था तनावपूर्ण बनेको थियो । स्थिति नियन्त्रणमा लिन प्रहरीले एक राउन्ड हवाई फायर गरेको थियो ।
डीआईजी रेग्मीका अनुसार घटना लगत्तै सुरक्षा व्यवस्था कडा बनाइएको छ । स्थानीय प्रशासन, सुरक्षा निकाय तथा राजनीतिक दलका प्रतिनिधिबीच छलफल भएपछि मतदान प्रक्रिया पुनः सुरु गर्ने सहमति बनेको हो ।
उनले केही समयभित्रै मतदान प्रक्रिया पुनः सुरु हुने र मतदातालाई निर्भय वातावरणमा मतदान गर्ने व्यवस्था मिलाइएको बताए ।
