- ६ कार्तिक २०८३, शुक्रबार / Oct 23, 2026
काठमाडौं, २१ फागुन । दोलखाको तामाकोशी गाउँपालिका–४ स्थित एक मतदान केन्द्रमा विवाद भएपछि सुरक्षाकर्मीले हवाई फायर गरेका छन् ।
मतदान केन्द्रमा उपस्थित केही व्यक्तिले निर्वाचनमा खटिएका कर्मचारीमाथि हातपात गर्न खोजेपछि अवस्था तनावपूर्ण बनेको थियो । स्थिति नियन्त्रणमा लिन सुरक्षाकर्मीले हवाई फायर गर्नुपरेको जिल्ला प्रशासन कार्यालय दोलखाले जनाएको छ ।
जिल्ला प्रशासन कार्यालय दोलखाका सहायक प्रमुख जिल्ला अधिकारी औलाखबहादुर आलेका अनुसार कर्मचारीमाथि आक्रमणको प्रयास भएपछि सुरक्षाकर्मीले चेतावनीस्वरूप एक–दुई राउन्ड हवाई फायर गरेका थिए । उनले तामाकोशी गाउँपालिका–४ को मतदान केन्द्रमा भएको उक्त घटनापछि सुरक्षाकर्मीको सक्रियतामा स्थिति नियन्त्रणमा आएको जानकारी दिए ।
सहायक प्रमुख जिल्ला अधिकारी आलेले अहिले मतदान केन्द्रको अवस्था सामान्य भइसकेको र मतदान प्रक्रिया प्रभावित नहुने गरी सुरक्षाको व्यवस्था कडा बनाइएको बताए ।
निर्वाचनको समयमा कुनै अप्रिय घटना हुन नदिन स्थानीय प्रशासन र सुरक्षाकर्मीले संवेदनशील क्षेत्रमा निगरानी बढाएका छन् ।
