- २२ आश्विन २०८३, बिहीबार / Oct 8, 2026
आन्तरिक वायुसेवा कम्पनीहरू स्वीकृत भाडादरको सस्तो दरमा टिकट बिक्री गर्न सहमत ।
चाडपर्वमा हवाई भाडा बढेको गुनासोपछि नियामक निकायले छलफल गरेको ।
नेपाल नागरिक उड्डयन प्राधिकरणले वायुसेवा कम्पनीका प्रतिनिधिसँग छलफल गरेको ।
यात्रुको चाप बढेका बेला महँगो भाडा लिने गरिएको गुनासो थियो ।
२०७२ सालदेखि आन्तरिक हवाई सेवामा न्यूनतमदेखि अधिकतमसम्म भाडादर निर्धारण हुँदै आएको छ ।
काठमाडौं, २२ असोज । आन्तरिक वायुसेवा कम्पनीहरू स्वीकृत भाडादरमध्ये सस्तो दरमा टिकट बिक्री तथा वितरण गर्न सहमत भएका छन् ।चाडपर्वको समयमा यात्रुको चाप बढेको मौका छोपेर हवाई भाडा महँगो बनाइएको गुनासो बढेपछि सरकारले यस विषयमा चासो देखाएको थियो ।
त्यसपछि नेपाल नागरिक उड्डयन प्राधिकरणले बिहीबार आन्तरिक वायुसेवा कम्पनीका पदाधिकारी तथा प्रतिनिधिसँग छलफल गरेको हो ।छलफलपछि वायुसेवा कम्पनीहरू स्वीकृत भाडादरको सस्तो दरमा टिकट बिक्री तथा वितरण गर्न सहमत भएको नेपाल नागरिक उड्डयन प्राधिकरणले जनाएको छ ।
आन्तरिक हवाई सेवाका लागि विसं २०७२ मङ्सिर २७ गते तत्कालीन पर्यटनमन्त्रीस्तरीय निर्णयबाट न्यूनतमदेखि अधिकतमसम्मको भाडादर निर्धारण गरिएको थियो । यात्रुको चाप कम भएका बेला कम्पनीहरूले सोही दायराभित्रको न्यूनतम भाडामा टिकट बिक्री गर्दै आएका छन् भने चाडपर्व तथा अन्य समयमा यात्रुको चाप बढ्दा अधिकतम भाडा लिने गरेका छन् ।
चाडपर्वको समयमा हवाई यात्रुको चाप बढ्ने भएकाले भाडा अत्यधिक महँगो भएको गुनासो यात्रुबाट आउन थालेपछि प्राधिकरणले वायुसेवा कम्पनीसँग छलफल गरेको हो । अब कम्पनीहरूले स्वीकृत भाडादरको सस्तो दरमा टिकट उपलब्ध गराउने सहमति गरेपछि चाडपर्वमा हवाई यात्रा गर्ने यात्रुलाई केही राहत पुग्ने अपेक्षा गरिएको छ ।
