- २४ आश्विन २०८३, शनिबार / Oct 10, 2026
भक्तपुर, २४ असोज । बागमती प्रदेश स्वास्थ्य मन्त्रालयकी स्वास्थ्य सचिव डा. सुमित्रा गौतम सम्मानित हुनुभएको छ । स्वास्थ्य सेवा क्षेत्रको विकास, गुणस्तरीय स्वास्थ्य सेवाको विस्तार तथा नागरिकको स्वास्थ्य सेवामा पहुँच अभिवृद्धिमा पुर्याउनुभएको योगदानको कदर गर्दै क्रियाशील पत्रकार मञ्च, भक्तपुरले उहाँलाई सम्मान गरेको हो ।
मञ्चले डा. गौतमलाई सम्मानपत्र प्रदान गर्दै स्वास्थ्य क्षेत्रको सुधार र संस्थागत विकासमा उहाँले निर्वाह गर्नुभएको भूमिकाको प्रशंसा गरेको छ । विशेषगरी भक्तपुर अस्पतालको मेडिकल सुपरिटेन्डेन्टका रूपमा कार्यरत रहँदा उहाँले अस्पतालको सेवा प्रवाह सुधार, व्यवस्थापकीय क्षमता अभिवृद्धि तथा संस्थागत विकासमा महत्वपूर्ण भूमिका निर्वाह गर्नुभएको सम्मानपत्रमा उल्लेख छ ।
उहाँको नेतृत्वमा भक्तपुर अस्पताललाई नमुना स्वास्थ्य संस्थाका रूपमा स्थापित गर्न योगदान पुगेको मञ्चले जनाएको छ । बागमती प्रदेशका मुख्यमन्त्री किरण थापा मगरको प्रमुख आतिथ्यता तथा क्रियाशील पत्रकार मञ्चका अध्यक्ष रमेश गिरी ‘आशा’ को अध्यक्षतामा सम्पन्न कार्यक्रममा डा. गौतमलाई सम्मानपत्र प्रदान गरिएको थियो ।
सम्मानपत्रमा डा. गौतमको निष्ठा, जिम्मेवारीबोध, कुशल व्यवस्थापकीय नेतृत्व र सेवाग्राहीमैत्री स्वास्थ्य प्रणाली विकासप्रतिको प्रतिबद्धताले स्वास्थ्य क्षेत्रको संस्थागत सुदृढीकरणमा सकारात्मक योगदान पुर्याएको उल्लेख छ ।
