- २६ असार २०८३, शुक्रबार / Jul 10, 2026
काठमाडौं, २७ वैशाख । द्वन्द्वपीडितहरूले सङ्क्रमणकालीन न्याय (टीआरसी) सम्बन्धी दुई आयोगको पदाधिकारी सिफारिस प्रक्रिया रद्द गरेर नयाँ प्रक्रिया सुरु गर्न माग गरेका छन्। बेपत्ता पारिएका व्यक्तिको छानबिन र सत्य निरुपण तथा मेलमिलाप आयोगका लागि गठित सिफारिस समितिले प्रकाशित गरेको संक्षिप्त सूचीप्रति असन्तुष्टि जनाउँदै पीडितहरूले काठमाडौंको माइतीघरमा प्रदर्शन गरेका छन्।
पीडित समुदायले सिफारिस प्रक्रिया अपारदर्शी, भागबन्डामा आधारित र पीडितहरूको अर्थपूर्ण सहभागिता बिना भएको आरोप लगाएका छन्। उनीहरूले पीडित समुदायको परामर्श र अपनत्व सुनिश्चित हुने गरी नयाँ प्रक्रिया सुरु गर्नुपर्ने माग गरेका छन्।
प्रदर्शनकारीहरूले सरकारले आफ्ना माग सम्बोधन नगरे समानान्तर नागरिक आयोग गठन गर्ने चेतावनी दिएका छन्। यसअघि पीडितहरूले प्रधानमन्त्री केपी शर्मा ओली र नेपाली कांग्रेसका सहभापति शेरबहादुर देउवासँग भेट गरी आयोगमा पीडित पक्षको प्रतिनिधित्व सुनिश्चित गर्न माग गरेका थिए।
