- २७ बैशाख २०८३, आईतवार / May 10, 2026
काठमाण्डौ, २७ बैशाख । भारतबाट हरेक रात हात्तीको बथान नेपाल प्रवेश गर्न थालेपछि झापाको मेचीनगरस्थित बाहुनडाँगी क्षेत्रका बासिन्दा त्रसित बनेका छन् ।
एक सातायता भारतको जंगलबाट आउने ३० देखि ४० वटा हात्तीको बथानले मेचीनगर नगरपालिका–१, ४ र ५ क्षेत्रमा किसानको मकै, सुपारीलगायत बालीमा क्षति पुर्याउँदै आएको छ । स्थानीयका अनुसार हात्तीहरू दिनभर भारततर्फको जंगलमा बस्ने र रात परेपछि बथान छुट्टिएर नेपाल प्रवेश गर्ने गरेका छन् ।
मेचीनगर–४ का वडाध्यक्ष अर्जुन कार्कीका अनुसार हात्तीको प्रवेश रोक्न, स्थानीय बासिन्दाको सुरक्षा गर्न तथा बाली जोगाउन सर्वपक्षीय बैठकमार्फत विभिन्न निर्णय गरिएको छ । यसअनुसार सुरक्षाकर्मी, वन रक्षक, रेपिड रेस्पोन्स टिमलगायतको संयुक्त टोली परिचालन गरिएको छ ।
सर्वपक्षीय बैठकले भारतीय वन अधिकारीसँग समन्वय गर्ने, बेलुका ६ बजापछि सीमा क्षेत्रमा सर्वसाधारणको आवतजावत रोक्ने, बस्ती वरिपरि मौसमी तारबार गर्ने तथा हात्ती खेदाउन ट्र्याक्टर परिचालन गर्ने निर्णय गरेको छ । ट्र्याक्टर सञ्चालनका लागि आवश्यक इन्धन नगरपालिकाले उपलब्ध गराउने तथा रातिको समयमा सतर्कता अपनाउन माइकिङसमेत गरिने वडाध्यक्ष कार्कीले जानकारी दिए ।
मानव–हात्ती द्वन्द्व व्यवस्थापन तथा वातावरण संरक्षण मञ्चका अध्यक्ष हरिप्रसाद उप्रेतीका अनुसार बाहुनडाँगीका सीमावर्ती क्षेत्रमा लगाइएको १८ किलोमिटर लामो सौर्य तारबारको मर्मतसम्भार प्रक्रिया पनि अघि बढाइएको छ । स्थानीयले हात्तीको नियमित प्रवेशले खेतीपाती नष्ट हुनुका साथै राति बाहिर निस्कनसमेत डर लाग्ने अवस्था सिर्जना भएको बताएका छन् ।
