- २४ असार २०८३, बुधबार / Jul 8, 2026
जिल्ला अदालत काठमाडौंले नक्कली भुटानी शरणार्थी प्रकरणमा १५ जनालाई दोषी ठहर।
पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाण र पूर्वगृहसचिव टेकनारायण पाण्डे दोषी ठहर।
सन्दीप रायमाझीसहित ७ जनाले सफाइ पाए।
फरार ८ प्रतिवादी पक्राउपछि कानुनी प्रक्रिया अघि बढाइने।
दोषी ठहर भएका व्यक्तिको सजाय निर्धारणका लागि असार २९ गते पेसी।
काठमाडौं, २४ असार । बहुचर्चित नक्कली भुटानी शरणार्थी प्रकरणमा जिल्ला अदालत काठमाडौंले पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाण, पूर्वगृहसचिव टेकनारायण पाण्डेसहित १५ जनालाई दोषी ठहर गरेको छ।
मुद्दा दायर भएको करिब तीन वर्षपछि न्यायाधीश तेजबहादुर खड्काको इजलासले मंगलबार फैसला सुनाउँदै रायमाझी, खाण र पाण्डेसहित केशव दुलाल, सानु भण्डारी, सागर राई, सन्देश शर्मा, तत्कालीन गृहमन्त्री रामबहादुर थापा ‘बादल’का सुरक्षा सल्लाहकार इन्द्रजित राई, गोविन्द चौधरी, कांग्रेसका पूर्वसांसद आङटावा शेर्पा, हज कमिटीका तत्कालीन अध्यक्ष शमशेर मियाँ, तत्कालीन गृहमन्त्री खाणका स्वकीय सचिव नरेन्द्र केसी, हरिभक्त महर्जन, निरञ्जनकुमार खरेल र बेचन झालाई दोषी ठहर गरेको हो।
अदालतले प्रतिवादी सन्दीप रायमाझीसहित सात जनालाई भने आरोप पुष्टि हुन नसकेको ठहर गर्दै सफाइ दिएको छ। सफाइ पाउनेमा रामशरण केसी, टंककुमार गुरुङ, प्रतीक थापा, लक्ष्मी महर्जन, केशव तुलाधर र आशिष बुढाथोकी पनि छन्।
यसैबीच, फरार रहेका अशोक पोखरेल, धिरेन राई, दीपा हुमागाईं, नीरज राई, राजेश अर्याल, मोहनराज राई, विनिता सावदेन लिम्बू र सुनिल बुढाथोकीको हकमा पक्राउ परेपछि कानुनबमोजिम मुद्दा अघि बढाइने अदालतले जनाएको छ।
दोषी ठहर भएका प्रतिवादीहरूको सजाय निर्धारणका लागि असार २९ गते पेसी तोकिएको छ। नेपाल प्रहरीको अनुसन्धानमा अघि बढाइएको यो बहुचर्चित उच्च-प्रोफाइल भ्रष्टाचार तथा मानव तस्करीसम्बन्धी मुद्दा लामो समयदेखि सार्वजनिक चासोको विषय बनेको थियो।
